അഫ്ഗാനിസ്ഥാനിലെ തെക്ക് കിഴക്കന് മേഖലയിലുണ്ടായ ഭൂചലനത്തില് കുടുങ്ങിയവര്ക്കായി രക്ഷാപ്രവര്ത്തനം തുടരുന്നു. മേഖലയിലെ കനത്ത മഴയും ഗതാഗത സൗകര്യം ഇല്ലാത്തതും രക്ഷാപ്രവര്ത്തനത്തിന് തടസമാണ്. ദുരന്തത്തില് ആയിരത്തിലധികം പേര് മരിച്ചു. ഭൂചലനം ഏറെ നാശംവിതച്ച പക്തിക പ്രവിശ്യയിലാണ് രക്ഷാപ്രവര്ത്തനം ദുഷ്കരമായിരിക്കുന്നത്. മലനിരകളാല് നിറഞ്ഞ മേഖലയില് നേരത്തെ തന്നെ ഗതാഗത സൗകര്യം പരിമിതമായിരുന്നു. മലയിടിഞ്ഞതിനൊപ്പം കനത്ത മഴകൂടിയായതോടെ 24 മണിക്കൂര് പിന്നിട്ടിട്ടും രക്ഷാപ്രവര്ത്തകര്ക്ക് പല മേഖലകളിലും എത്താന് സാധിച്ചിട്ടില്ല. ആയിരക്കണക്കിന് ആളുകള് കെട്ടിടാവശിഷ്ടങ്ങള്ക്കിടയില് കുടുങ്ങിക്കിടക്കുന്നുണ്ടെന്നാണ് യുണിസെഫ് മേധാവി സാം മോര്ട്ട് അഫ്ഗാനിലെ പ്രതിനിധികളെ ഉദ്ധരിച്ച് അറിയിച്ചത്. രണ്ടായിരത്തിലധികം വീടുകള് തകര്ന്നു. നിലവില് അഫ്ഗാനിസ്ഥാനിലുള്ള റെഡ് ക്രസന്റ് ഉള്പ്പെടെ സംഘടനകളും യു.എന് സന്നദ്ധ പ്രവര്ത്തകരും രക്ഷാപ്രവര്ത്തനത്തില് പങ്കുചേരുന്നുണ്ട്.