മണലിൽ, തെങ്ങുകൾ
വിരിച്ചു തന്നൊരു
തണലിൽ, വേപഥു
കലരും ചിത്തമോ –
ടിരുന്നു;ആഴിതന്നി-
രുമ്പഴിക്കൂട്ടു
തുറന്നു കിട്ടുവാ-
നലറി, കണ്ണുക –
ളുരുട്ടി, മുഷ്ടികൾ
ചുരുട്ടി വായുവി
ലെറിഞ്ഞു തുള്ളുന്ന
തിരയെ നോക്കി ഞാൻ .
കരയെ ഞണ്ടു പോൽ
കരണ്ടു ചിന്തകൾ
കരളിൽ: ജീവിത –
ക്കടലിൽ ഞാനൊരു
തിരയായെത്ര നാൾ
തിരിയും? മോചന
സമരമെത്ര നാൾ
തുടരും? എന്നിനി –
യണയും പച്ചച്ച
കരയിലാനന്ദ
ലഹരി മോന്തു വാൻ
രസിച്ചു വീഴുവാൻ?
പരന്ന പാത്രത്തി-
ലൊരുക്കി വെച്ചുള്ള
തിളങ്ങും പഞ്ചാര –
ത്തരികളെന്നുള്ളിൽ
നിനച്ചു വെൺമണൽ
ത്തരികളെ നക്കി
തിരിച്ചു പോകുന്ന
തിരപോലെത്ര ഞാൻ
തിരിച്ചു പോന്നു ഹാ
തകർന്ന സ്വപ്നമായ്!
തരിച്ചു നിന്നെത്ര
മരിച്ച മോഹമായ്!!
About The Author
One thought on “കദനക്കടലിൽ😭 – ബേബി കാക്കശ്ശേരി (സ്വിറ്റ്സർലാന്റ്)”
👍👍👌👌