ഒരു ഭദ്രദീപം കൊളുത്തി വെയ്ക്കട്ടെ ഞാ-
നിരുളിനെ വാതില്പ്പുറത്തു തള്ളാന്,
പ്രണയം നിറക്കൂട്ടു ചാര്ത്തുന്ന നിന് മുഖ-
ത്തണയാത്ത പുഞ്ചിരി കണ്ടിരിക്കാന്.
ഒരു പാനപാത്രം നിറച്ചു വെയ്ക്കട്ടെ നാ-
മിരുവര്ക്കുമായിക്കുടിച്ചു തീര്ക്കാന്.
മധുരമല്ലതില് നമ്മളൊരുമിച്ചതിന് തീവ്ര-
ലഹരിയാണതു പങ്കു വെച്ചിരിക്കാം.
ചിതറിത്തെറിക്കുന്ന ചിന്തകള് ചേര്ത്തു വെ-
ച്ചൊരു ജീവിതത്തെ തിരിഞ്ഞു നോക്കാം;
അറിയാത്ത ലാഭക്കണക്ക് നോക്കേണ്ടതിന്
നിറഭംഗി മാത്രം നുണഞ്ഞിരിക്കാം.
ഒരു വര്ണ്ണനൂലില് നാമൊരുമിച്ചു മററാരു-
മറിയാത്ത മുത്തുകള് കോര്ത്തെടുക്കാം.
നിറവസന്തം വായ്ച്ച വഴികളില് കൈകള് ചേര്-
ത്തൊരു മാത്ര കൂടിക്കടന്നു പോകാം.
പതിയെപ്പതുങ്ങി വന്നിരുളതാ വാതിലിന്
പടി വരെ വന്നെത്തി നോക്കി നില്പൂ.
പകരട്ടെ ഞാനീ വിളക്കില് വീണ്ടും സ്നേഹ-
മൊരുമിച്ചിരിക്കാം നമുക്കിങ്ങനെ.
(‘ചില്ലക്ഷരങ്ങള്’ എന്ന കവിതാസമാഹാരത്തില് നിന്ന്)
