ദോഹ ∙ ഇന്ത്യയിൽ നിന്നു ഖത്തറിൽ എത്തുന്നവർക്ക് ഞായർ മുതൽ ഹോട്ടൽ ക്വാറന്റീൻ ആവശ്യമില്ല. എന്നാൽ, ഇഹ്തെറാസ് മൊബൈൽ ആപ്ലിക്കേഷനിലെ പ്രീ-റജിസ്ട്രേഷൻ, കോവിഡ് പരിശോധന എന്നിവയിൽ മാറ്റമില്ല. പുതുക്കിയ നയം 4ന് വൈകിട്ട് ദോഹ സമയം 6.00 നു പ്രാബല്യത്തിലാകും. ക്വാറന്റീൻ നീക്കിയത് ഫിഫ ലോകകപ്പ് കാണാൻ എത്തുന്നവർക്കും മറ്റു പ്രവാസികൾക്കും ആശ്വാസമായി.
∙ കോവിഡ് വാക്സീൻ എടുത്തവർക്കും അല്ലാത്തവർക്കും കോവിഡ് പരിശോധന (പിസിആർ അല്ലെങ്കിൽ ആന്റിജൻ) നിർബന്ധമാണ്. പിസിആർ പരിശോധനയാണെങ്കിൽ 48 മണിക്കൂറിനുള്ളിലും ആന്റിജൻ ആണെങ്കിൽ 24 മണിക്കൂറിനകവും നടത്തിയതിന്റെ ഫലം കൈവശം ഉണ്ടാകണം.
∙ സിനോഫാം, സിനോവാക്, സ്പുട്നിക് വി, കോവാക്സീൻ എന്നിവ എടുത്തവരാണെങ്കിൽ പോസിറ്റീവ് സെറോളജി പരിശോധനാഫലവും ഹാജരാക്കണം. മറ്റ് ഖത്തർ അംഗീകൃത വാക്സീൻ എടുത്തവർക്ക് ഇതു വേണ്ട.
∙ ഗൾഫ് രാജ്യങ്ങളിലെ പൗരന്മാർക്കും പ്രവാസി താമസക്കാർക്കും ഇഹ്തെറാസ്-പ്രീ റജിസ്ട്രേഷൻ വേണ്ട.
∙ ഖത്തറിൽ താമസിക്കുന്ന പ്രവാസികൾ വിദേശത്തു നിന്നു മടങ്ങിയെത്തി 24 മണിക്കൂറിനകം റാപ്പിഡ് ആന്റിജൻ പരിശോധന നടത്തണം. പോസിറ്റീവ് എങ്കിൽ ഹോം ക്വാറന്റീനിൽ കഴിയണം.
English Summary: No hotel quarantine in qatar from sunday
