സ്വർഗ്ഗം വരികയാണ് ! – യുദ്ധ വിരുദ്ധ കവിത – ജയൻ വർഗീസ്.

തമസ്സിന്റെ തോട് പോളിച്ചീ യുഗത്തിന്റെ –

യരുമയാം ചുണ്ടിലച്ചോദ്യം :

എവിടെ മനീഷികൾ കാണുവാനിച്ഛിച്ച

മനുഷ്യന്റെ മഹനീയ ലോകം?

മതവാദിപ്പരിഷകൾ ദൈവത്തെ കഷണമായ്

വഴിനീളെ തൂക്കി വിൽക്കുമ്പോൾ,

ഇടനെഞ്ച്‌ പിളരുന്ന വേദന ശാപമായ്

ഉറയുന്നു , പിടയുന്നു  ലോകം !

എവിടെ മത- രാഷ്ട്ര  തിരിവുകൾക്കപ്പുറ –

ത്തതിരുകളില്ലാത്ത ലോകം ?

എവിടെ കരൾ പിളർന്നപരനെ   കരുതുന്ന

ചുടു ചോര ‘ മീവലിൻ ‘ ലോകം ?

അകലെയൊളിച്ചിരുന്നാരോ തൊടുക്കുന്ന –

യതിക്രൂര ‘ക്രൂയിസ് ’ മിസൈലിൽ ,

മരണം വിതക്കുന്ന ക്രൂരത മനുഷ്യന്റെ

ചുടുചോരയിൽ ഇനി വേണ്ടാ.

ഒരു കൊച്ചു കുഞ്ഞിന്റെ ജീവന് പകരമായ്

‘ ഒരു ലോകം മുഴുവനും ? ‘  വേണ്ടാ,

ഉണരട്ടെ യിവൾ ഭൂമി യൂഷസ്സിന്റെ തുടി താള –

പ്പെരുമയി ലുണരട്ടെ വീണ്ടും !

വരികയായ്, വരികയായ് . ഒരു നല്ല നാളെ തൻ

രഥ ചക്ര ‘ രവ ‘ കരകങ്ങൾ !

മനുഷ്യനും, മനുഷ്യനും കൈകോർത്തു നിൽക്കുന്ന

മഹനീയ മലർവാടകങ്ങൾ

അപരന്റെ വേദനക്കൊരു നുള്ളു സാന്ത്വന –

മുഴിയുന്ന മനസ്സുമായ് നിൽക്കെ,

മനുഷ്യനും, ദൈവവും ഒരുമിച്ചീ  യുഗസന്ധി

പണിയുന്നീ പാഴ്മണ്ണിൽ സ്വർഗ്ഗം.!