നോട്ടപ്പുള്ളി(കൾ): സതീഷ് കളത്തിൽ.

അങ്ങ്,
ആ മലഞ്ചെരുവിനു മുകളിലെ
ആകാശകോണുകളിൽ, നിശബ്ദമായ്
അടയിരിക്കുന്ന മേഘങ്ങൾക്കിടയിൽ
പലപ്പോഴും, ഞാൻ പോയി

പതുങ്ങിയിരിക്കാറുണ്ട്.

അവിടെനിന്നും ഉയരാറുള്ള
ആ പാട്ടുകൾക്കെന്തു ചന്തമാണ്?!!
അതിത്രമാത്രം മധുരതരമായി പാടുന്ന
ആ പൂങ്കുയിലാരാണ്?!!

ചിലപ്പോളേതോ പെൺകുയിൽ,
ചറപറാന്ന് ഞാറ് നടുംനേരം

പാടുന്നതാകാമെന്നു തോന്നും;

പാടത്തെ ചേറിൽനിന്നെന്നപോലെ,
വിയർപ്പിൻറെ ഒരു വന്യസുഗന്ധം
വിരുന്നെത്താറുണ്ട്, ആ സമയമെന്നിൽ.

പലപ്പോഴുമത്,
പ്രണയത്തിൻറെ നഷ്ടകണക്കുകളുടെ
അനുവർത്തനംപോലെയോ
അരികെയുള്ള പ്രണയത്തിൻറെ
ആശ്ലേഷംപോലെയോയൊക്കെയുള്ള
അനുരാഗപ്പാട്ടുകളായും തോന്നാറുമുണ്ട്.

ആകാശത്ത്,
അവളിൽ ജീവിക്കുന്നേതോ നാമമവൾ

അടയാളപ്പെടുത്തിയിടുന്നതുപോലെ...

കന്മഷം തീണ്ടിയെത്തുന്ന മനസിന്,
ഉന്മേഷം പകരാതെ കടന്നുപോകാറില്ലവ.

ഉള്ളിനെ നങ്കൂരത്തിൽ കൊളുത്തിവിടുന്ന
അഹങ്കാരമാണെപ്പോഴുമാ സ്വരത്തിന്.

‘ആരാണവൾ; അയാളും…?’
ആ മേഘങ്ങളവിടെ പെയ്യാൻ മടിച്ച്

അടയിരിയ്ക്കാറുള്ളതും ഒരുപക്ഷെ,
അതറിയാൻതന്നെയാകണം.

അതുകൊണ്ടുകൂടിയാണെനിക്കും,

അവിടെ ചെന്നിരിക്കാൻ തോന്നുന്നതും;
അന്വേഷിക്കാൻ തോന്നാതിരിക്കുന്നതും.

***************************

സതീഷ് കളത്തിൽ.
കോമളാലയം,
ശങ്കരയ്യ റോഡ്,
പി.ഓ. പൂത്തോൾ,
തൃശ്ശൂർ- 680 004
9446 761 243, 7012 490551