RCB Coach: മുൻ സിംബാബ്‌വെ താരം ആൻഡി ഫ്ലവറിനെ മുഖ്യ പരിശീലകനായി നിയമിച്ച് റോയൽ ചലഞ്ചേഴ്‌സ് ബാംഗ്ലൂർ. സഞ്ജയ് ബംഗറായിരുന്നു ആർസിബിയുടെ കോച്ച്. എന്നാൽ കഴിഞ്ഞ സീസണിലെ പ്രകടനവും മെച്ചപ്പെട്ടതല്ലാത്ത സാഹചര്യത്തിലാണ് ആർസിബി വമ്പൻ മാറ്റത്തിന് മുതിരുന്നത്. ബാംഗറിന് പുറമെ ഡയറക്‌ടർ ഓഫ് ക്രിക്കറ്റ് ഓപ്പറേഷൻസ് അയി പ്രവർത്തിച്ചിരുന്ന മൈക്ക് ഹെസനും സ്ഥാനം ഒഴിയും.
“ഐസിസി ഹാൾ ഓഫ് ഫേമും ടി20 ലോകകപ്പ് ജേതാവായ ആൻഡി ഫ്ലവറിനെ ആർസിബി പുരുഷ ടീമിന്റെ ഹെഡ് കോച്ചായി സ്വാഗതം ചെയ്യുന്നതിൽ ഞങ്ങൾക്ക് അതിയായ സന്തോഷമുണ്ട്” ആർസിബി പ്രസ്‌താവനയിൽ പറഞ്ഞു.
കഴിഞ്ഞ രണ്ട് വർഷമായി ലഖ്‌നൗ സൂപ്പർ ജയന്റ്‌സിനൊപ്പം പ്രവർത്തിച്ചതിന് ശേഷമാണ് ആൻഡി ഫ്ലവർ ഐപിഎല്ലിൽ ബെംഗളൂരുവിൽ ഇടം കണ്ടെത്തുന്നത്. 2022ൽ ഫ്രാഞ്ചൈസി അരങ്ങേറ്റം കുറിച്ചപ്പോൾ മുതൽ ഫ്ലവറായിരുന്നു കോച്ച്.
ടീമിന്റെ ഉപദേഷ്‌ടാവ് ഗൗതം ഗംഭീർ, ക്യാപ്റ്റൻ കെഎൽ രാഹുൽ എന്നിവരുമായി അടുത്ത് പ്രവർത്തിക്കുകയും ആദ്യ രണ്ട് സീസണുകളിൽ ടീമിനെ പ്ലേ ഓഫിലേക്ക് നയിക്കുകയും ചെയ്‌തു. ജൂലൈയിൽ ഫ്ലവറുമായി വേർപിരിഞ്ഞതിന് ശേഷം ഓസ്‌ട്രേലിയൻ ഇതിഹാസം ജസ്‌റ്റിൻ ലാംഗറിനെ ടീമിന്റെ മുഖ്യ പരിശീലകനായി നിയമിച്ചിരുന്നു.
സിംബാബ്‌വെയ്ക്ക് വേണ്ടി 63 ടെസ്‌റ്റുകളിലും 213 ഏകദിനങ്ങളിലും കളിച്ച താരം 10,000ത്തിലധികം റൺസ് നേടിയിട്ടുണ്ട്. ലോകമെമ്പാടുമുള്ള വിവിധ ടി20 ഫ്രാഞ്ചൈസികളിൽ പരിശീലകനായി പ്രവർത്തിച്ച അനുഭവ സമ്പത്തുണ്ട് ഫ്ലവറിന്. മാത്രമല്ല ഇംഗ്ലണ്ട് അടക്കമുള്ള മുൻനിര ടീമുകളുടെ പരിശീലകനായും ഫ്ലവർ കഴിവ് തെളിയിച്ചിട്ടുണ്ട്.
Credits: https://malayalam.indiatoday.in/
About The Author
