വർഷങ്ങളൊരുപാടു കടന്നു പോയിരുന്നു
നമ്മളിരുവരും വീണ്ടും കണ്ടുമുട്ടുമ്പോൾ
ആകാശത്തിലേക്കൊരു പാട്
പക്ഷികളും പറന്നകന്നിരുന്നു.
പൂക്കളും . തളിരുകളും നിറഞ്ഞ
വസന്തങ്ങളുമെത്രയോ കൊഴിഞ്ഞിരുന്നു
അടഞ്ഞ മിഴികൾക്കുള്ളിലിത്രനാളും
ഓർമ്മകളാരെയോ തേടി അലഞ്ഞിരുന്നു.
നനുത്ത കാറ്റിന്റെ സ്പർശവുമായി
പല ദേശങ്ങളുടെ സ്മരണകളിൽ
ഹൃദയമെന്നും തേങ്ങിയിരുന്നു.
യാത്ര പറയാതെയേതോ ജന്മത്തിൽ
പിരിഞ്ഞവരായിരിക്കണം
അപ്രതീക്ഷിതമായ കണ്ടുമുട്ടലിൽ
പ്രണയത്തിൻ പൂക്കളപ്പോളും
വാടാതെ വിടർന്നു നിന്നിരുന്നു.
