നമുക്ക് ശത്രുക്കളും മിത്രങ്ങളുമില്ലാത്തവരായി ആരും ഉണ്ടാകാനിടയില്ല. ശത്രുക്കളോടുള്ള നമ്മുടെ മനോഭാവം എന്താണ്? നിക്കോസ് കസന്റ് സാക്കിസിന്റെ ലാസ്റ്റ് ടെംപ്റ്റേഷനിൽ ( അന്ത്യ പ്രലോഭനം) ശിമയോൻ ക്രിസ്തുവിനോട് ചോദിക്കുന്നുണ്ട് : ” യൂദാസിനോട് അങ്ങേയ്ക്കെന്താണ് ഒരു പ്രത്യേക വാത്സല്യം ? അവൻ അരികിൽ വരുമ്പോഴൊക്കെ അങ്ങയുടെ മിഴികൾ വല്ലാതെ ആർദ്രമാകുന്നുണ്ടല്ലോ?” യേശു മറുപടി ഇങ്ങനെയായിരുന്നു : ” കരുതലും കരുണയും അർഹിക്കുന്നവരായി യൂദാസിനെപ്പോലെയല്ലാതെ നിങ്ങളിൽ മറ്റാരുമില്ലാത്തതു കൊണ്ടാണ്. ” തന്നെ ഒറ്റിക്കൊടുത്തവനോടുള്ള ,ശത്രുവിനോടുള്ള ക്രിസ്തു മനോഭാവം ഇതായിരുന്നു. ഏറ്റവും വെറുക്കപ്പെടേണ്ടവനെന്ന് നമ്മുടെ മനസ്സ് മന്ത്രിക്കുന്നവരെയാണ് നാം ഏറ്റവും കൂടുതൽ സ്നേഹിക്കേണ്ടത്. ” ഇവർ ചെയ്യുന്നത് എന്താണെന്ന് ഇവർ അറിയുന്നില്ല ” എന്ന മനോഭാവം നമ്മിൽ ഉണ്ടാകണം. അതിന് നമ്മുടെ കാഴ്ചവട്ടം വലുതാക്കിയേ മതിയാകൂ. എങ്കിലേ ശത്രുവിനെ സ്നേഹിക്കാനാവൂ.
