ആകാശത്തെ റഷ്യൻ കയ്യാങ്കളി

ചൊവ്വാഴ്ച കരിങ്കടലിനു മുകളിൽ റഷ്യൻ പോർവിമാനവുമായി കൂട്ടിയിടിച്ചു യുഎസ് ഡ്രോൺ തകർന്നു കടലിൽ വീണതിന്റെ വിഡിയോ യുഎസ് പുറത്തുവിട്ടു. 42 സെക്കൻഡ് വിഡിയോ ഡ്രോണിലെ ക്യാമറയിൽ നിന്നുള്ളതാണ്. ദൃശ്യങ്ങൾ ഇങ്ങനെ

∙ എംക്യു–9 റീപ്പർ ഡ്രോണിനു സമീപത്തേക്ക് പിന്നിൽ നിന്നു പാഞ്ഞടുക്കുന്ന റഷ്യൻ സുഖോയ് സു–27 പോർവിമാനം.

∙ ഡ്രോണിനു നേർക്ക് ഇന്ധനപ്രവാഹം. ഡ്രോണിനെ ഇടിക്കുന്നില്ല.

∙ ഡ്രോണിനു സമീപത്തേക്കു രണ്ടാംതവണയും വിമാനം എത്തുന്നു.

∙ വിമാനത്തിൽ നിന്നുള്ള ഇന്ധനം ഡ്രോണിലേക്കു വീണ്ടും ചൊരിയുന്നു.

∙ പ്രൊപ്പല്ലറിൽ വിമാനം ഇടിക്കുന്നു. തുടർന്ന് വിഡിയോ സിഗ്നൽ നഷ്ടപ്പെടുന്നു.പ്രൊപ്പല്ലർ നശിച്ചതായുള്ള ദൃശ്യം പിന്നീട്.

അപകടപ്പറക്കൽ

ഡ്രോണിനെ ഇടിച്ച സു–27 യുദ്ധവിമാനം അതിസാഹസികമായ രീതിയിലാണ് പറന്നതെന്ന് വിദഗ്ധർ പറയുന്നു. ഇടി പാളിയെങ്കിൽ വിമാനവും തകർന്നേനെ. ഡ്രോൺ വീഴ്ത്താൻ വിമാനത്തിലെ പീരങ്കി പ്രയോഗിച്ചാൽ മതിയെങ്കിലും അതു യുദ്ധ പ്രഖ്യാപനമായി വ്യഖ്യാനിക്കപ്പെടും എന്നതിനാലാണ് റഷ്യ ഈ മാർഗം സ്വീകരിച്ചതെന്നാണു വിലയിരുത്തൽ.

 സു–27 പോർവിമാനം

∙ 1980 മുതൽ റഷ്യൻ വ്യോമസേനയിൽ

∙ മണിക്കൂറിൽ 2500 കിലോമീറ്റർ വരെ വേഗം

∙ 21 മീറ്റർ നീളം, 14 മീറ്റർ ചിറകളവ്; ലോകത്തിലെ ഏറ്റവും വലുപ്പമുള്ള പോർവിമാനങ്ങളിലൊന്ന്.

∙ ലേസർ നിയന്ത്രിത ബോംബുകൾ, കപ്പൽവേധ മിസൈലുകൾ തുടങ്ങിയവ വഹിക്കാൻ ശേഷി.

എംക്യു 9 റീപ്പർ

∙ നിരീക്ഷണത്തിനും ആക്രമണത്തിനും യുഎസ് ഉപയോഗിക്കുന്നു.

∙ വേഗം: മണിക്കൂറിൽ 482 കി.മീ.

∙15 കിലോമീറ്റർ വരെ പൊക്കത്തിൽ 1700 കിലോമീറ്റർ ദൂരം തുടർച്ചയായി പറക്കും.

∙ മിസൈലുകൾ, ലേസർ നിയന്ത്രിത ബോംബുകൾ എന്നിവ വഹിക്കും.

English Summary: U.S. Says Russian Fighter Jet Hit American Drone Over Black Sea