Kerala Rain Alert: സംസ്ഥാനത്ത് വ്യാഴാഴ്ച വരെ ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ്. ബംഗാള് ഉള്ക്കടലില് രൂപപ്പെടാൻ സാധ്യതയുള്ള ന്യൂനമര്ദ്ദത്തിന്റെ സ്വാധീനഫലമായി ഇടിമിന്നലോട് കൂടിയ മഴ തുടരുമെന്നാണ് കാലാവസ്ഥ വകുപ്പിന്റെ അറിയിപ്പ്. അതേസമയം തീവ്രമഴ സാധ്യത മുന്നില് കണ്ട് ആലപ്പുഴ, ഇടുക്കി ജില്ലകളില് പ്രഖ്യാപിച്ചിരുന്ന ഓറഞ്ച് അലര്ട്ട് പിന്വലിച്ചു. ആലപ്പുഴ ജില്ലയില് തിങ്കളാഴ്ചയും ചൊവ്വാഴ്ചയും ഇടുക്കിയില് ബുധനാഴ്ചയുമാണ് തീവ്രമഴ പ്രവചിച്ചിരുന്നത്.
അതേസമയം തെക്കന് ജില്ലകളില് ഒറ്റപ്പെട്ടയിടങ്ങളില് ശക്തമായ മഴ തുടരും. ജാഗ്രതയുടെ ഭാഗമായി തിരുവനന്തപുരം, കൊല്ലം, ആലപ്പുഴ ജില്ലകളില് ഇന്ന് യെല്ലോ അലര്ട്ട് പ്രഖ്യാപിച്ചു. തിങ്കളാഴ്ച ആലപ്പുഴ, എറണാകുളം ജില്ലകളിലും ചൊവ്വാഴ്ച പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകളിലും ബുധനാഴ്ച എറണാകുളം, ഇടുക്കി ജില്ലകളിലും , വ്യാഴാഴ്ച ആലപ്പുഴ, എറണാകുളം, തൃശൂര്, മലപ്പുറം, കോഴിക്കോട്, കണ്ണൂര് ജില്ലകളിലും ജാഗ്രതാനിര്ദേശം നല്കി. ഈ ദിവസങ്ങളില് ഈ ജില്ലകളില് ഒറ്റപ്പെട്ട ശക്തമായ മഴയാണ് പ്രവചിക്കുന്നത്.
വടക്ക് പടിഞ്ഞാറന് ബംഗാള് ഉള്ക്കടലില് ഇന്ന് പുതിയൊരു ചക്രവാതച്ചുഴി രൂപപ്പെടുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ കണക്കുകൂട്ടല്. തുടര്ന്നുള്ള 48 മണിക്കൂറില് ഇത് ന്യൂനമര്ദമായി ശക്തി പ്രാപിക്കാനും സാധ്യതയുണ്ടെന്നും കേന്ദ്ര കാലാവസ്ഥ വകുപ്പിന്റെ മുന്നറിയിപ്പില് പറയുന്നു.
Credits: https://malayalam.indiatoday.in/
