Udhayanidhi Stalin against Amit sha: കേന്ദ്ര ആഭ്യന്തര മന്ത്രി അമിത് ഷായുടെ ‘ഹിന്ദി ദിവസ്’ പ്രസംഗത്തിനെതിരെ രൂക്ഷ വിമർശനവുമായി തമിഴ്നാട് കായിക യുവജക്ഷേമ മന്ത്രി ഉദയനിധി സ്റ്റാലിൻ. ഹിന്ദി അടിച്ചേൽപ്പിക്കാൻ അമിത് ഷാ ആഹ്വാനം ചെയ്യുകയാണെന്നും, നാലോ അഞ്ചോ സംസ്ഥാനങ്ങളിൽ സംസാരിക്കുന്ന ഹിന്ദി രാജ്യത്തെ മുഴുവൻ ഒന്നിപ്പിക്കുന്നുവെന്ന് പറയുന്നത് അസംബന്ധമാണെന്നും ഉദയനിധി പറഞ്ഞു. സനാതന ധർമത്തിനെതിരായി ഉദയനിധി നടത്തിയ വിവാദ പരാമർശം ആളിക്കത്തുന്നതിനടിയിലാണ് പുതിയ പരാമർശവുമായി മന്ത്രി രംഗത്തെത്തിയിരിക്കുന്നത്.
ഇന്ത്യയിലെ ഭാഷകളുടെ വൈവിധ്യത്തെ ഒന്നിപ്പിക്കുന്നതാണ് ഹിന്ദിയെന്നും, വിവിധ ആഗോള, പ്രാദേശിക ഭാഷകളെയും ഭാഷകളെയും അത് ആദരിക്കുന്നുണ്ടെന്നും ഹിന്ദി ദിനാചരണത്തോടനുബന്ധിച്ച് നൽകിയ സന്ദേശത്തിൽ അമിത് ഷാ പറഞ്ഞിരുന്നു. ഹിന്ദി ഒരിക്കലും മറ്റൊരു ഇന്ത്യൻ ഭാഷയോടും മത്സരിചിട്ടില്ലെന്നും എല്ലാ ഭാഷകളും ശക്തിപ്പെടുത്തുന്നതിലൂടെ മാത്രമേ ശക്തമായ ഒരു രാജ്യം ഉയർന്നുവരുകയുള്ളൂവെന്നും അദ്ദേഹം സന്ദേശത്തിൽ വ്യക്തമാക്കിയിരുന്നു. ഇതിനെതിരെയാണ് ഉദയനിധി രംഗത്തെത്തിയിരിക്കുന്നത്.
“ഹിന്ദി രാജ്യത്തെ ജനങ്ങളെ ഒന്നിപ്പിക്കുന്നു – പ്രാദേശിക ഭാഷകളെ ശാക്തീകരിക്കുന്നു എന്നൊക്കെ പറഞ്ഞ് പതിവുപോലെ ഹിന്ദി ഭാഷയോടുള്ള സ്നേഹം ചൊരിഞ്ഞുകൊണ്ട് കേന്ദ്രമന്ത്രി അമിത് ഷാ എത്തിയിട്ടുണ്ട്. ഹിന്ദി പഠിച്ചാൽ മുന്നേറാം എന്ന ആക്രോശത്തിന്റെ ഒരു ബദൽ രൂപമാണ് ഈ സന്ദേശം. തമിഴ്നാട്ടിൽ തമിഴ് – കേരളത്തിൽ മലയാളം. ഈ രണ്ട് സംസ്ഥാനങ്ങളെ ഹിന്ദി എവിടെയാണ് ഒന്നിപ്പിക്കുന്നത്? ശാക്തീകരണം എവിടെയാണ് വരുന്നത്? നാലോ അഞ്ചോ സംസ്ഥാനങ്ങളിൽ സംസാരിക്കുന്ന ഹിന്ദി രാജ്യത്തെ മുഴുവൻ ഒന്നിപ്പിക്കുന്നുവെന്ന് പറയുന്നത് അസംബന്ധമാണ്. ഹിന്ദി ഒഴികെയുള്ള ഭാഷകളെ പ്രാദേശിക ഭാഷകളായി തരംതാഴ്ത്തുന്നത് അമിത് ഷാ അവസാനിപ്പിക്കണം,” -#StopHindiImposition എന്ന ഹാഷ്ടാഗോടെ ഉദയനിധി എക്സിൽ കുറിച്ചു
Credits: https://malayalam.indiatoday.in/
