മധ്യപ്രദേശിലെ ഉജ്ജയിനില് ബലാത്സംഗത്തിനിരയായ 12 വയസുകാരി ആശുപത്രിയില്. ഗുരുതരാവസ്ഥയില് ആശുപത്രിയിലെത്തിച്ച കുട്ടിയെ വിദഗ്ധ ചികിത്സയ്ക്കായി ഇന്ഡോറിലേക്ക് മാറ്റി. ബലാത്സംഗ ശേഷം നഗരത്തിലെ ബദ്നഗര് റോഡിലെ ദണ്ഡി ആശ്രമത്തിന് സമീപം കുട്ടിയെ ഉപേക്ഷിക്കുകയായിരുന്നു. ഉടുവസ്ത്രമില്ലാതെ രക്തം വാര്ന്ന നിലയില് കുട്ടി തെരുവിലൂടെ നടക്കുന്ന സിസിടിവി ദൃശ്യങ്ങള് പുറത്തുവന്നിട്ടുണ്ട്. സഹായം ചോദിക്കുന്ന കുട്ടിയെ നാട്ടുകാര് ആട്ടിയോടിക്കുന്നതും ദൃശ്യങ്ങളില് കാണാം. 1 മിനിറ്റ് 7 സെക്കന്ഡ് ദൈര്ഘ്യമുള്ള വീഡിയോയാണ് പുറത്തുവന്നത്.
സംഭവത്തില് പൊലീസ് കേസ് രജിസ്റ്റര് ചെയ്തിട്ടുണ്ട്. ബലാത്സംഗത്തിനിരയായ പെണ്കുട്ടി ഉത്തര്പ്രദേശിലെ പ്രയാഗ്രാജ് സ്വദേശിയാണെന്നാണ് പൊലീസിന്റെ വിലയിരുത്തല്. ‘സംഭവത്തില് കേസ് രജിസ്റ്റര് ചെയ്യുകയും കുറ്റവാളികളെ എത്രയും വേഗം കണ്ടെത്താനും പിടികൂടാനും പ്രത്യേക അന്വേഷണ സംഘം (എസ്ഐടി) രൂപീകരിക്കുകയും ചെയ്തു. കുട്ടി ബലാത്സംഗത്തിനിരയായതായി വൈദ്യപരിശോധനയില് സ്ഥിരീകരിച്ചിട്ടുണ്ട് ‘, പോലീസ് ഉദ്യോഗസ്ഥനായ സച്ചിന് ശര്മ്മ പറഞ്ഞു.
പെണ്കുട്ടി എവിടെ നിന്നാണ് വരുന്നതെന്ന് കൃത്യമായി ഞങ്ങളോട് പറഞ്ഞിട്ടില്ല. എന്നാല് സംസാരശൈലിയില് നിന്ന് ഉത്തര്പ്രദേശിലെ പ്രയാഗ്രാജ് സ്വദേശിയാണെന്നാണ് സൂചനയെന്നും അദ്ദേഹം കൂട്ടിച്ചേര്ത്തു.
Credits: https://malayalam.indiatoday.in/
