Canadian Army Website Hacked: കനേഡിയൻ സായുധ സേനയുടെ ഔദ്യോഗിക വെബ്സൈറ്റ് ബുധനാഴ്ച താൽക്കാലികമായി പ്രവർത്തനരഹിതമായതായി റിപ്പോർട്ടുകൾ. ദ ടെലിഗ്രാഫിന്റെ റിപ്പോർട്ട് അനുസരിച്ച്, ‘ഇന്ത്യൻ സൈബർ ഫോഴ്സ്’ എന്ന ഹാക്കർമാരുടെ സംഘമാണ് വെബ്സൈറ്റ് ഹാക്ക് ചെയ്തതെന്നാണ് റിപ്പോർട്ടുകൾ. സൈബർ ആക്രമണത്തിന്റെ ഉത്തരവാദിത്തം അവർ എക്സ് പോസ്റ്റിലൂടെ ഏറ്റെടുത്തു.
ഉച്ചയോടെയാണ് തടസ്സം നേരിട്ടതെന്നും പിന്നീട് അത് പരിഹരിക്കപ്പെട്ടുവെന്നും പ്രതിരോധ വകുപ്പിലെ മീഡിയ റിലേഷൻസ് മേധാവി ഡാനിയൽ ലെ ബൗത്തിലിയർ ദി ഗ്ലോബ് ആൻഡ് മെയിലിനോട് പറഞ്ഞു.
“കനേഡിയൻ എയർഫോഴ്സ് വെബ്സൈറ്റ് നീക്കം ചെയ്തു” എന്ന് പ്രഖ്യാപിച്ച ഇന്ത്യൻ സൈബർ ഫോഴ്സ്, ഇതിന്റെ സ്ക്രീൻഷോട്ട് എക്സ് പോസ്റ്റിലൂടെ പങ്കിടുകയും ചെയ്തിരുന്നു.
ചില ഡെസ്ക്ടോപ്പ് ഉപയോക്താക്കൾക്ക് സൈറ്റ് ആക്സസ് ചെയ്യാൻ കഴിഞ്ഞുങ്കിലും, മിക്ക മൊബൈൽ ഉപകരണങ്ങളിലും ഇത് കിട്ടുന്നുണ്ടായിരുന്നില്ലെന്നാണ് ഗ്ലോബ് ആൻഡ് മെയിൽ റിപ്പോർട്ടിൽ പറയുന്നത്.
ബാധിക്കപ്പെട്ട വെബ് സൈറ്റ് കനേഡിയൻ ഗവൺമെന്റ് വെബ്സൈറ്റുകളിൽ നിന്നും ദേശീയ പ്രതിരോധ വകുപ്പിന്റെ പൊതു വെബ്സൈറ്റുകളിൽ നിന്നും മറ്റ് ആന്തരിക നെറ്റ്വർക്കുകളിൽ നിന്നും വേറിട്ടതും, ഒറ്റപ്പെട്ടതുമാണ്. തങ്ങളുടെ സിസ്റ്റങ്ങളിൽ കാര്യമായ പ്രശ്നങ്ങൾ നേരിട്ടതിന്റെ സൂചനകളൊന്നും ലഭിച്ചിട്ടില്ലെന്ന് ലെ ബൗത്തിലിയർ വ്യക്തമാക്കി.
നാവികസേന, പ്രത്യേക കമാൻഡ് ഗ്രൂപ്പുകൾ, വ്യോമ, ബഹിരാകാശ പ്രവർത്തനങ്ങൾ എന്നിവയുൾപ്പെടെ കാനഡയിലെ എല്ലാ സൈനിക പ്രവർത്തനങ്ങൾക്കും നേതൃത്വം നൽകുന്ന കനേഡിയൻ സേന നിലവിൽ ഈ വിഷയത്തെ കുറിച്ച് അന്വേഷിക്കുകയാണ്.
നേരത്തെ, സെപ്റ്റംബർ 21ന് ഇന്ത്യൻ സൈബർ ഫോഴ്സ് കാനഡയ്ക്ക് എതിരെ ഭീഷണി മുഴക്കിയിരുന്നു. കനേഡിയൻ സൈബർസ്പേസിനെതിരായ ആക്രമണത്തിന്റെ ശക്തി നേരിട്ടറിയാൻ തയ്യാറായിരിക്കണമെന്ന് സോഷ്യൽ മീഡിയ വഴിയാണ് മുന്നറിയിപ്പ് നൽകിയത്.
സെപ്റ്റംബർ 22ന്, കനേഡിയൻ സർക്കാരിന്റെ ആരോപണങ്ങളിലും ഇന്ത്യാ വിരുദ്ധ രാഷ്ട്രീയത്തിലും ഗ്രൂപ്പ് അതൃപ്തി പ്രകടിപ്പിച്ചിരുന്നു. ഖാലിസ്ഥാൻ ഭീകരൻ ഹർദീപ് സിംഗ് നിജ്ജാറിന്റെ മരണത്തിൽ കനേഡിയൻ പ്രധാനമന്ത്രി ജസ്റ്റിൻ ട്രൂഡോ ഇന്ത്യയ്ക്കെതിരെ കഴിഞ്ഞയാഴ്ച ആരോപണം ഉന്നയിച്ചതിന് പിന്നാലെ ഇന്ത്യയും കാനഡയും തമ്മിലുള്ള നയതന്ത്ര പ്രതിസന്ധി രൂക്ഷമായതിനിടെയാണ് ഈ സൈബർ ആക്രമണം.
അതേസമയം, കാനഡയുടെ ആരോപണങ്ങളെ അസംബന്ധം എന്നാണ് ഇന്ത്യ വിശേഷിപ്പിച്ചത്. കനേഡിയൻ മണ്ണിൽ പ്രവർത്തിക്കുന്ന തീവ്രവാദികൾക്കും ഇന്ത്യാ വിരുദ്ധ ഘടകങ്ങൾക്കും എതിരെ ശക്തമായി ഇറങ്ങാൻ കാനഡയോട് ആവശ്യപ്പെട്ട ഇന്ത്യ, കനേഡിയൻ പൗരൻമാർക്കുള്ള വിസ സേവനങ്ങൾ താൽക്കാലികമായി നിർത്തിവയ്ക്കുകയും ചെയ്തിരുന്നു.
