Shubman Gill ODI: ഇന്ത്യൻ ബാറ്റിങ് സെൻസേഷൻ ശുഭ്മാൻ ഗില്ലിനെ പ്രശംസിച്ച് മുൻ ഇന്ത്യൻ താരം യുവരാജ് സിംഗ്. ഈ തലമുറയിലെ ഏറ്റവും മികച്ച താരമാവാൻ ഗില്ലിന് കഴിവുണ്ടെന്ന് യുവരാജ് പറഞ്ഞു. ഏഷ്യാകപ്പിലെ മിന്നും പ്രകടനവും, ഈ വർഷം ഏകദിനത്തിൽ ഏറ്റവും വലിയ റൺവേട്ടക്കാരനായതും ഉൾപ്പടെ മികച്ച ഫോമിലാണ് താരം.
“ഈ തലമുറയിലെ ഏറ്റവും മികച്ച കളിക്കാരനാകാൻ ശുഭ്മാൻ ഗില്ലിന് കഴിവുണ്ട്. അവൻ കഠിനാധ്വാനം ചെയ്യുന്നു. 19-20 വയസ്സ് മുതൽ, അവന്റെ മനോഭാവം എപ്പോഴും അങ്ങനെ തന്നെയാണ്. കുട്ടിക്കാലം മുതൽ അവൻ ഒരു സാധാരണ ആൺകുട്ടിയെക്കാൾ നാലിരട്ടിയോളം കഠിനാധ്വാനം ചെയ്യുന്നു. ഈ കാലഘട്ടത്തിലെ ഏറ്റവും മികച്ച താരമാകാൻ അവന് കഴിയും.” യുവരാജ് സിംഗ് പറയുന്നു.
ഈ വർഷം ഏകദിനത്തിൽ ഗിൽ അസാധാരണ പ്രകടനമാണ് കാഴ്ചവച്ചത്. 20 ഇന്നിംഗ്സുകളിൽ നിന്ന് 1230 റൺസ് നേടിയ ഗിൽ ഈ വർഷം ഏകദിനത്തിൽ ഏറ്റവും കൂടുതൽ റൺസ് നേടിയ താരമാണ്. 105.03 സ്ട്രൈക്ക് റേറ്റ് ഉള്ള അദ്ദേഹത്തിന്റെ ശരാശരി 72.35 ആയിരുന്നു.
വരും വർഷങ്ങളിൽ ഗിൽ ഓസ്ട്രേലിയ, ദക്ഷിണാഫ്രിക്ക, ഇംഗ്ലണ്ട് തുടങ്ങിയ ഇടങ്ങളിൽ മികച്ച പ്രകടനം നടത്തുമെന്നും യുവരാജ് പറഞ്ഞു. “ഇന്ത്യ ജയിച്ച ഒരു ടെസ്റ്റ് മത്സരത്തിൽ ഗിൽ 91 റൺസ് നേടി. ഓസ്ട്രേലിയയിലേക്കുള്ള ആദ്യ പര്യടനത്തിൽ അവൻ രണ്ട് അർധസെഞ്ചുറികളും നേടി. മുൻപ് എത്ര കളിക്കാർ അത് നേടിയെന്ന് എനിക്കറിയില്ല. ഓസ്ട്രേലിയയിലും, സൗത്ത് ആഫ്രിക്കയിലും, ഇംഗ്ലണ്ടിലും അവൻ റൺസ് നേടുമെന്ന് എനിക്ക് ഉറപ്പുണ്ട്.” യുവരാജ് കൂട്ടിച്ചേർത്തു.
Credits: https://malayalam.indiatoday.in/
