Pakistanis unable to get passport: പാകിസ്ഥാനിൽ ലാമിനേഷൻ പേപ്പറിന്റെ ക്ഷാമം കാരണം രാജ്യത്തെ പൗരന്മാർക്ക് പാസ്പോർട്ട് ലഭിക്കുന്നില്ലെന്ന് ദി എക്സ്പ്രസ് ട്രിബ്യൂൺ റിപ്പോർട്ട് ചെയ്തു. ലാമിനേഷൻ പേപ്പർ പാസ്പോർട്ടിലെ ഒരു പ്രധാന ഘടകമാണ്. ഇത് സാധാരണയായി ഫ്രാൻസിൽ നിന്നാണ് ഇറക്കുമതി ചെയ്യുന്നതെന്ന് പാകിസ്ഥാന്റെ ഡയറക്ടറേറ്റ് ജനറൽ ഓഫ് ഇമിഗ്രേഷൻ ആന്റ് പാസ്പോർട്ടിനെ (ഡിജിഐആന്റ് പി) ഉദ്ധരിച്ച് റിപ്പോർട്ട് പറയുന്നു. കടലാസിന്റെ ക്ഷാമം രാജ്യവ്യാപകമായി പാസ്പോർട്ട് ക്ഷാമത്തിന് ഇടയാക്കിയതായി റിപ്പോർട്ട് പറയുന്നു.
പാസ്പോർട്ട് ലഭിക്കാത്തത് മൂലം വിദേശത്ത് പഠിക്കാൻ പോകുന്നവരും നാട്ടിൽ നിന്ന് പുറത്ത് ജോലിക്കായി പോകുന്നവരും ആശങ്കയിലാണ്. യുകെ, ഇറ്റലി തുടങ്ങിയ സ്ഥലങ്ങളിലെ സർവ്വകലാശാലകളിൽ പ്രവേശനം നേടിയ നിരവധി വിദ്യാർത്ഥികൾക്ക് കൃത്യസമയത്ത് പാസ്പോർട്ട് ലഭിക്കാത്തതിനാൽ പഠനം പാതി നിലച്ച അവസ്ഥയിലാണ്. സർക്കാരിന്റെ കാര്യക്ഷമതയില്ലായ്മക്ക് വില കൊടുക്കേണ്ടി വരുന്നത് അന്യായമാണെന്ന് ദി എക്സ്പ്രസ് ട്രിബ്യൂണിനോട് ആളുകൾ പറഞ്ഞു.
പ്രതിസന്ധി പരിഹരിക്കാൻ പാകിസ്ഥാൻ സർക്കാർ പ്രവർത്തിക്കുന്നുണ്ടെന്നും സ്ഥിതിഗതികൾ ഉടൻ നിയന്ത്രണവിധേയമാക്കുമെന്നും ആഭ്യന്തര മന്ത്രാലയത്തിലെ മീഡിയ ഡയറക്ടർ ജനറൽ ഖാദിർ യാർ തിവാന പറഞ്ഞു. എന്നാൽ, യാത്രാരേഖകൾ ലഭിക്കാത്തതിനാൽ ആളുകൾ നിരാശയിലാണ്. പാസ്പോർട്ട് വാങ്ങാൻ എത്തണമെന്ന് പറഞ്ഞുകൊണ്ട് ഒക്ടോബറിൽ ഡിജിഐ ആൻഡ് പിയിൽ നിന്ന് തനിക്ക് സന്ദേശം ലഭിച്ചതായും എന്നാൽ ബന്ധപ്പെട്ട ഓഫീസിൽ എത്തിയപ്പോൾ തന്റെ പാസ്പോർട്ട് ഇതുവരെ എത്തിയിട്ടില്ലെന്ന് ജീവനക്കാർ തന്നോട് പറഞ്ഞതായും അമീർ ദി എക്സ്പ്രസ് ട്രിബ്യൂണിനോട് പറഞ്ഞു.
തന്റെ രേഖ അടുത്തയാഴ്ച വരുമെന്ന് സെപ്റ്റംബർ മുതൽ പാസ്പോർട്ട് ഓഫീസ് വാഗ്ദാനം ചെയ്തിരുന്നെന്നും എന്നാൽ ആഴ്ചകൾ കഴിഞ്ഞിട്ടും അത് ഇതുവരെ എത്തിയിട്ടില്ലെന്നും മുഹമ്മദ് ഇമ്രാൻ പറഞ്ഞു. പ്രതിദിനം 3,000 മുതൽ 4,000 വരെ പാസ്പോർട്ടുകൾ നൽകിയിടത്ത് ഇപ്പോൾ 12 മുതൽ 13 വരെ പാസ്പോർട്ടുകൾ മാത്രമാണ് നൽകുന്നതെന്ന് പ്രാദേശിക പാസ്പോർട്ട് ഓഫീസുകൾ സ്ഥിരീകരിച്ചു. പാസ്പോർട്ടിന് അപേക്ഷിച്ച പലരും അനിശ്ചിതത്വത്തിലാണ്. നിലവിലെ സാഹചര്യം ഒറ്റപ്പെട്ട സംഭവമല്ലെന്നാണ് റിപ്പോർട്ട്. 2013-ൽ, ഡിജിഐ ആൻഡ് പി പ്രിന്ററുകൾക്കുള്ള പണവും ലാമിനേഷൻ പേപ്പറുകളുടെ അഭാവവും കാരണം പാകിസ്ഥാനിൽ പാസ്പോർട്ട് പ്രിന്റിംഗ് നിർത്തിവച്ചിരുന്നു
Credits: https://malayalam.indiatoday.in/
