ബോംബെ ഇന്ത്യന് ഇന്സ്റ്റിറ്റ്യൂട്ട് ഓഫ് ടെക്നോളജിയില് (ഐഐടി) പലസ്തീന് ഭീകരരെ പിന്തുണച്ച് സംസാരിച്ചതിന് പ്രൊഫസര്ക്കും ഗസ്റ്റ് സ്പീക്കര്ക്കുമെതിരെ പരാതിയുമായി വിദ്യാര്ഥികള്. നവംബര് ആറിന് ഹ്യൂമാനിറ്റീസ് ആന്ഡ് സോഷ്യല് സയന്സസ് (എച്ച്എസ്എസ്) വിഭാഗം പ്രൊഫസര് ശര്മ്മിഷ്ഠ സാഹയും ഗസ്റ്റ് സ്പീക്കര് സുധന്വ ദേശ്പാണ്ഡെയും ഹമാസിന് അനുകൂലമായി സംസാരിച്ചെന്നാണ് പരാതി. ഇരുവര്ക്കുമെതിരെ നടപടിയെടുക്കണമെന്നാണ് വിദ്യാര്ത്ഥികള് പരാതിയില് ആവശ്യപ്പെടുന്നത്.
പലസ്തീന് ഭീകര സംഘടനയായ ഹമാസും ഇസ്രായേലും തമ്മില് കഴിഞ്ഞ 35 ദിവസമായി നടക്കുന്ന യുദ്ധത്തില് ആയിരക്കണക്കിന് ആളുകള്ക്ക് ജീവന് നഷ്ടപ്പെട്ടിരുന്നു. ഒരു വശത്ത് അമേരിക്കയും യുകെയുമുള്പ്പെടെ ഒട്ടേറെ വലിയ രാജ്യങ്ങള് ഇസ്രായേലിനൊപ്പമുണ്ട്. മറുവശത്ത് 22 അറബ് രാജ്യങ്ങളുടെ പിന്തുണ പലസ്തീന് ലഭിച്ചു. അതേസമയം ഇന്ത്യയിലും പക്ഷം സജീവമാണ്.ചിലര് ഇസ്രായേലിനെ പരസ്യമായി പിന്തുണയ്ക്കുമ്പോള് മറ്റു ചിലര് പലസ്തീന് ഒറ്റപ്പെട്ടതില് അതൃപ്തരാണ്. ഇതിനിടെയാണ് ഐഐടിയിലെ പ്രൊഫസര്ക്കെതിരെ പരാതി ഉയരുന്നത്.
‘HS 835 പെര്ഫോമന്സ് തിയറി ആന്ഡ് പ്രാക്സിസ്’ എന്ന അക്കാദമിക് കോഴ്സിന്റെ പേരിലാണ് ചര്ച്ച നടന്നത്. എന്നാല് ഇതില് പക്ഷപാതപരവും തെറ്റായതുമായ കഥകള് വിദ്യാര്ത്ഥികളെ ബോധവല്ക്കരിക്കാന് ഉപയോഗിച്ചെന്നും വിദ്യാര്ത്ഥികള് പറയുന്നു. ദേശ്പാണ്ഡെ തീവ്ര ഇടതുപക്ഷക്കാരനാണെന്നും അദ്ദേഹം തന്റെ സ്ഥാനം അനുചിതമായി ഉപയോഗിച്ചെന്നും പരാതിയിലുണ്ട്. സുധന്വ ദേശ്പാണ്ഡെ ഫലസ്തീനിയന് ഭീകരന് സക്കറിയ സുബൈദിയെ മഹത്വവത്കരിച്ചെന്നും ഇത് ഐഐടി ബോംബെയുടെ അക്കാദമിക് സമഗ്രതയ്ക്കും സുരക്ഷയ്ക്കും അസ്വസ്ഥതയുണ്ടാക്കുമെന്നും അദ്ദേഹം ആരോപിച്ചു.
ഐഐടിയില് സ്പീക്കറായി എത്തിയ സുധന്വ, തീവ്രവാദിയായ സുബൈദി അല് അഖ്സയെ കണ്ടതായി പരിപാടിക്കിടെ പറഞ്ഞു. ഈ പ്രസ്താവന കാര്യമായ ആശങ്കയ്ക്ക് ഇടയാക്കിയിട്ടുണ്ട്.2015ല് പലസ്തീന് ഭീകരന് സുബൈദിയെ കണ്ടതായി അദ്ദേഹം സമ്മതിക്കുക മാത്രമല്ല, അക്രമത്തെയും സായുധ കലാപത്തെയും പ്രതിരോധിക്കുകയും മഹത്വവല്ക്കരിക്കുകയും ചെയ്തു. അല്-അഖ്സ രക്തസാക്ഷി ബ്രിഗേഡുമായി ബന്ധപ്പെട്ട വ്യക്തിയാണ് സുബൈദി.യുണൈറ്റഡ് സ്റ്റേറ്റ്സ്, യൂറോപ്യന് യൂണിയന്, ഇസ്രായേല് എന്നിവയുള്പ്പെടെ വിവിധ സര്ക്കാരുകളും അന്താരാഷ്ട്ര സംഘടനകളും തീവ്രവാദിയായി പ്രഖ്യാപിച്ച സംഘടനയാണിത്. അല്-അഖ്സ രക്തസാക്ഷി ബ്രിഗേഡിന് തീവ്രവാദവും സാധാരണക്കാരെ ലക്ഷ്യമിട്ടുള്ള ആക്രമണങ്ങളുമായി ബന്ധമുണ്ടെന്നും അതിനാല് പ്രൊഫസറും അതിഥി പ്രഭാഷകനും സംഘടനയുമായുള്ള ബന്ധം ഗുരുതരമായ പ്രശ്നങ്ങള് സൃഷ്ടിക്കുമെന്ന് പരാതിയില് പറയുന്നു.
ഇന്ത്യന് സ്വാതന്ത്ര്യ സമരവുമായി താരതമ്യപ്പെടുത്തി
‘പലസ്തീന് സമരം ഒരു സ്വാതന്ത്ര്യ സമരമാണ്. ലോക ചരിത്രത്തില്, കൊളോണിയലിസത്തിന്റെ ചരിത്രത്തില്, 100 ശതമാനം പൂര്ണ്ണമായി നടന്ന ഒരു പോരാട്ടം ഇതുവരെ ഉണ്ടായിട്ടില്ല. ഒരിക്കലുമില്ല! ഇന്ത്യന് സ്വാതന്ത്ര്യസമരം 100 ശതമാനം അക്രമരഹിതമായിരുന്നില്ല’, ദേശ്പാണ്ഡെ പരിപാടിക്കിടെ പറഞ്ഞു. ഇക്കാര്യങ്ങള് അടക്കം ചൂണ്ടിക്കാട്ടിയാണ് പൊലീസിന് നല്കിയ പരാതി.
Credits: https://malayalam.indiatoday.in/
