Delhi Air Pollution: ഡൽഹിയിലെ വായു ഗുണനിലവാരത്തിൽ നേരിയ പുരോഗതി. കേന്ദ്ര മലിനീകരണ നിയന്ത്രണ ബോർഡിന്റെ (സിപിസിബി) കണക്കനുസരിച്ച് ശനിയാഴ്ച ഡൽഹിയിലെ മൊത്തത്തിലുള്ള വായു ഗുണനിലവാരം ‘മോശം’ വിഭാഗത്തിലാണെങ്കിലും കഴിഞ്ഞ ദിവസങ്ങളെ അപേക്ഷിച്ച് മെച്ചപ്പെട്ടു. കഴിഞ്ഞ ദിവസം രാത്രിയിൽ പെയ്ത മഴയാണ് സ്ഥിതി മെച്ചപ്പെടാൻ കാരണം.
ദേശീയ തലസ്ഥാനത്തെ മലിനീകരണ ഹോട്ട്സ്പോട്ടുകളിലൊന്നായി കണക്കാക്കുന്ന ആനന്ദ് വിഹാറിൽ, എക്യുഐ 282 ആയി രേഖപ്പെടുത്തിയപ്പോൾ, ആർകെ പുരത്ത് ഇത് 220 ആയിരുന്നു. പഞ്ചാബി ബാഗ് മേഖലയിൽ 236 രേഖപ്പെടുത്തിയപ്പോൾ ഐടിഒയിൽ എക്യുഐ ശനിയാഴ്ച രാവിലെ 263 ആയിരുന്നു.
പൂജ്യത്തിനും 50നും ഇടയിലാണെങ്കിൽ വായു നിലവാര സൂചിക ‘മികച്ചത്’ എന്നാണ് കണക്കാക്കുക. 51നും 100നും ഇടയിലാണെങ്കിൽ ‘തൃപ്തികരം’, 101നും 200നും ഇടയിൽ ‘ ഇടത്തരം’, 201നും 300നും ഇടയിൽ ‘മോശം’, 301നും 400നും ഇടയിൽ ‘വളരെ മോശം’, 401നും 500നുമിടയിൽ ‘ഗുരുതരം’ എന്നിങ്ങനെയാണ് കണക്കാക്കുക.
മഴയില്ലെങ്കിലും ആകാശം മേഘാവൃതം
ഇന്ത്യൻ കാലാവസ്ഥാ വകുപ്പ് (ഐഎംഡി) പറയുന്നതനുസരിച്ച്, ഡൽഹിയിൽ ഇന്ന് മഴയുണ്ടാകാൻ സാധ്യതയില്ല. രാവിലെ ആകാശം ഭാഗികമായി മേഘാവൃതമായിരിക്കുമെന്ന് കാലാവസ്ഥാ വകുപ്പ് അറിയിച്ചു.
കുറഞ്ഞ താപനില 14 ഡിഗ്രി സെൽഷ്യസിലും കൂടിയ താപനില ഇന്ന് 27 ഡിഗ്രി സെൽഷ്യസിലും എത്തുമെന്നാണ് പ്രവചനം.
Credits: https://malayalam.indiatoday.in/
