പതിനാറാം നൂറ്റാണ്ടിലെ ഫ്രഞ്ച് പ്രവാചകനും തത്വചിന്തകനും ഫാർമസിസ്റ്റുമായിരുന്ന നോസ്ട്രഡാമസിൻ്റെ (Nostradamus) പ്രവചനങ്ങൾ വളരെ പ്രസിദ്ധങ്ങളാണ്. മെെക്കിൾ ഡി നോസ്ട്രഡാമസ് (Michel de Nostradamus) എന്നായിരുന്നു അദ്ദേഹത്തിൻറെ മുഴുവൻ പേര്. പ്രവചനങ്ങൾ (The Prophecies) എന്ന പേരിലുള്ള അദ്ദേഹത്തിൻറെ വിഖ്യാത ഗ്രന്ഥത്തിലൂടെയാണ് അദ്ദേഹം പ്രശസ്തനായത്. ഭാവിയിൽ നടക്കുന്ന സംഭവങ്ങളെക്കുറിച്ചുള്ള അദ്ദേഹത്തിൻ്റെ പ്രവചനങ്ങളാണ് ഈ പുസ്തകത്തിൽ. ജർമ്മനിയിലെ ഹിറ്റ്ലറുടെ ഉദയവും അമേരിക്കൻ പ്രസിഡൻ്റായിരുന്നു ജോൺ എഫ് കെന്നഡിയുടെ കൊലപാതകവും ഫ്രാൻസിസ് മാർപാപ്പയുടെ ആഗമനവും നോസ്ട്രഡാമസിൻ്റെ പ്രവചനങ്ങളിൽ ഉൾപ്പെട്ടിട്ടുണ്ടായിരുന്നു. ഏതാനും ദിവസങ്ങൾക്കുള്ളിൽ കടന്നെത്തുന്ന 2024 സംബന്ധിച്ച ചില പ്രവചനങ്ങളും അദ്ദേഹം നടത്തിയിട്ടുണ്ടെന്നുള്ളതും കൗതുകകരമാണ്.
ഹാരി രാജകുമാരൻ രാജാവാകും
ബ്രിട്ടനിലെ ഹാരി രാജകുമാരൻ രാജാവായി മാറുമെന്നുള്ളതാണ് 2024 സംബന്ധിച്ച് ശ്രദ്ധേയമായ പ്രവചനം. അദ്ദേഹത്തിൻ്റെ `കിംഗ് ഓഫ് ഐൽ´ എന്ന പുസ്തകത്തിലാണ് ഇക്കാര്യം ചൂണ്ടിക്കാണിച്ചിരിക്കുന്നത്. അതേസമയം ചാൾസ് മൂന്നാമൻ രാജാവിനെ കുറിച്ചാണ് ഇക്കാര്യം പറയുന്നതൊന്നും ചിലർ കരുതുന്നുണ്ട്. ‘ഉടൻ (വിനാശകരമായ ഒരു യുദ്ധത്തിന് ശേഷം) ഒരു പുതിയ രാജാവ് കിരീടധാരണം ചെയ്യും, രാജാവിൻ്റെ ഭരണം ഭൂമിയെ ഏറെനാൾ സന്തോഷിപ്പിക്കും´- എന്നാണ് നോസ്ട്രാഡാമസ് പറയുന്നത്. തനിക്കും ഭാര്യയ്ക്കുമെതിരെയുള്ള നിരന്തരമായ ആക്രമണങ്ങൾക്ക് വിധേയനായിക്കൊണ്ടിരിക്കുന്ന ചാൾസ് മൂന്നാമൻ രാജാവ് ഉടൻ സ്ഥാനമൊഴിഞ്ഞേക്കുമെന്നും വില്യമിന് പകരം ഹാരി അദ്ദേഹത്തിന് പകരക്കാരനാകുമെന്നുമാണ് ബ്രിട്ടീഷ് എഴുത്തുകാരനും നോസ്ട്രഡാമസിൻ്റെ കൃതികളുടെ നിരൂപകനുമായ മരിയോ റീഡിംഗ് ചൂണ്ടിക്കാട്ടുന്നത്.
ചൈന യുദ്ധത്തിലേക്ക്
ചെെന യുദ്ധത്തിലേക്ക് പ്രവേശിക്കുമെന്നുള്ള പ്രവചനവും നോസ്ട്രഡാമസ് നടത്തിയിരുന്നുവെന്നും ചൂണ്ടിക്കാണിക്കപ്പെടുന്നു. ‘കര യുദ്ധങ്ങളും കടൽ യുദ്ധങ്ങളും വർദ്ധിക്കും. കൂടാതെ ചുവന്ന ശത്രു ഭയത്താൽ വിളറുകയും വിശാലമായ സമുദ്രത്തെ ഭയപ്പെടുത്തുകയും ചെയ്യും’ എന്നുള്ള നോസ്ട്രഡാമസിൻ്റെ വാക്കുകളാണ് ചെെനയെക്കുറിച്ചുള്ളതാണെന്ന് ചൂണ്ടിക്കാണിക്കപ്പെടുന്നത്. ഇവിടെ പറഞ്ഞിരിക്കുന്ന ചുവപ്പ് നിറം ചൈനയെയും അതിൻ്റെ ചുവന്ന പതാകയെയുമാണ് സൂചിപ്പിക്കുന്നതെന്നാണ് അവർ ചൂണ്ടിക്കാട്ടുന്നത്. അതേസമയം ‘കടൽ യുദ്ധം’ എന്നുള്ളത് തായ്വാനും ചൈനയുമായുള്ള സംഘർഷത്തെ അർത്ഥമാക്കാമെന്നും കരുതപ്പെടുന്നു. ലോകത്തിലെ ഏറ്റവും വലിയ നാവികസേന സ്ഥിതി ചെയ്യുന്നത് ചൈനയുടെ തലസ്ഥാനമായ ബെയ്ജിംഗിലാണെന്നു കൂടി ഓർക്കേണ്ടതുണ്ട്.
കാലാവസ്ഥാ ദുരന്തങ്ങൾ
കാലാവസ്ഥാ മാറ്റങ്ങും നോസ്ട്രാഡാമസിൻ്റെ പ്രവചനങ്ങളിലുണ്ട്. വർദ്ധിച്ചുവരുന്ന കാട്ടുതീയും സർവ്വ റിക്കോർഡുകളും മറികടക്കുന്ന താപനില വർദ്ധനവും കാരണം കാലാവസ്ഥാ ദുരന്തത്തിന് നാം സാക്ഷ്യം വഹിക്കേണ്ടി വരുമെന്നാണ് നോസ്ട്രഡാമസ് പ്രവചിക്കുന്നതെന്നാണ് വിലയിരുത്തൽ. ‘വരണ്ട ഭൂമി കൂടുതൽ വരളും, അതിനിടയിൽ വലിയ വെള്ളപ്പൊക്കമുണ്ടാകും’- എന്ന പ്രവചനം കാലാവസ്ഥാ ദുരന്തത്തേയാണ് സൂചിപ്പിക്കുന്നതെന്നാണ് കരുതപ്പെടുന്നത്. മാത്രമല്ല തീവ്രമായ കാലാവസ്ഥാ വ്യതിയാനങ്ങൾക്കൊപ്പം ആഗോളതലത്തിൽ പട്ടിണിയുണ്ടാകുമെന്നുള്ള കാര്യവും അദ്ദേഹത്തിൻ്റെ പ്രവചനങ്ങളിലുണ്ടെന്നും ചിലർ പറയുന്നു.’പകർച്ചവ്യാധിയുടെ വ്യാപനം കാരണം വലിയ ക്ഷാമം ഉണ്ടാകും.’ എന്നാണ് നോസ്ട്രഡാമസ് പറഞ്ഞിരിക്കുന്നത്.
പുതിയ പോപ്പ്
നോസ്ട്രഡാമസിൻ്റെ പ്രവചനമനുസരിച്ച് ഫ്രാൻസിസ് മാർപാപ്പയ്ക്ക് പകരം മറ്റൊരു മാർപാപ്പ ഉടൻ വന്നേക്കാമെന്നാണ് പലരും കരുതുന്നത്. ‘വളരെ പ്രായമായ ഒരു പുരോഹിതൻ്റെ മരണശേഷം വളരെക്കാലം സിംഹാസനത്തിലിരിക്കുന്ന പ്രായം കുറഞ്ഞ ഒരു റോമൻ തിരഞ്ഞെടുക്കപ്പെടും´- എന്നാണ് നോസ്ട്രാഡാമസ് തൻ്റെ പുസ്തകത്തിൽ എഴുതിയത്. തൻ്റെ 87-ാം ജന്മദിനത്തിന് ഏതാനും ദിവസങ്ങൾ മാത്രം ശേഷിക്കെ ഫ്രാൻസിസ് മാർപാപ്പയുടെ ആരോഗ്യനില വഷളായിരുന്നു. പനി ബാധയും ശ്വാസകോശത്തിലെ നീർക്കെട്ടും ശ്വാസതടസ്സവും കാരണം മാർപാപ്പയ്ക്ക് ഐക്യരാഷ്ട്രസഭയുടെ കാലാവസ്ഥാ സമ്മേളനത്തിൽ നിന്ന് പുറത്തുപോകേണ്ടിയും വന്നിരുന്നു.
അതേസമയം നോസ്ട്രഡാമസിൻ്റെ 2023-ലെ ഏറ്റവും ഭയാനകമായ ചില പ്രവചനങ്ങൾ ഇതുവരെ യാഥാർത്ഥ്യമായിട്ടില്ലെന്നാണ് വസ്തുത. 2023 അവസാനിക്കാൻ ഏതാനും ചില ദിവസങ്ങൾ മാത്രമാണ് ബാക്കിയാകുന്നത്.
Credits: https://malayalam.indiatoday.in/
