Covid-19 Increases: കോവിഡ് (Covid-19 cases) കേസുകൾ ഉയരുന്ന സാഹചര്യത്തിൽ രാജ്യങ്ങൾക്ക് മുന്നറിയിപ്പുമായി ലോകാരോഗ്യ സംഘടന (World Health Organisation) (ഡബ്യുഎച്ചഒ). കോവിഡ് -19 കേസുകളിൽ ശക്തമായ നിരീക്ഷണം നിലനിർത്താനും കണക്കുകൾ പങ്കിടുന്നത് തുടരാനും ലോകാരോഗ്യ സംഘടന രാജ്യങ്ങളോട് ആവശ്യപ്പെട്ടു. കേസുകളുടെ വർദ്ധനവിന് പിന്നിലെ കാരണങ്ങൾ വിശദീകരിക്കുകയും സ്വീകരിക്കാവുന്ന മുൻകരുതലുകളെക്കുറിച്ചും സംസാരിക്കുന്ന ആഗോള ബോഡിയുടെ കോവിഡ് -19 സാങ്കേതിക മേധാവി ഡോ. മരിയ വാൻ കെർഖോവിന്റെ വീഡിയോയും ഡബ്ല്യുഎച്ച്ഒ പങ്കുവച്ചു. ബിഎ.2.86ന്റെ ഉപവിഭാഗമായ ജെഎൻ.1 (JN.1) എന്നറിയപ്പെടുന്ന പുതിയ വകഭേദത്തിന്റെ വ്യാപനം മൂലം വിവിധ രാജ്യങ്ങളിൽ കോവിഡ്-19 കേസുകൾ കുത്തനെ ഉയരുന്ന സാഹചര്യമാണ് നിലവിൽ. ഇതിന് പിന്നാലെയാണ് മുന്നറിയിപ്പുമായി ലോകാരോഗ്യ സംഘടന മുന്നറിയിപ്പുമായി രംഗത്തെത്തിയത്.
അതേസമയം കേരളത്തിൽ കോവിഡ് ഉപ-വകഭേദമായ ജെഎൻ.1ന്റെ ഒരു കേസ് റിപ്പോർട്ട് ചെയ്ത സാഹചര്യത്തിൽ സംസ്ഥാന ആരോഗ്യ മന്ത്രിയുടെ നേതൃത്വത്തിൽ ഇന്ന് ഉന്നതതല യോഗം ചേർന്നേക്കും. “പ്രചരിക്കുന്നത് കോവിഡ് -19 മാത്രമല്ല. ഇൻഫ്ലുവൻസ, മറ്റ് വൈറസുകൾ, ബാക്ടീരിയകൾ എന്നിവയുണ്ട്. ലോകത്തിന്റെ മറ്റ് ഭാഗങ്ങളിൽ, അവധിക്കാലമായതിനാൽ ആളുകൾ ഒത്തുകൂടുന്നു. ഇത്തരത്തിലുള്ള ഒത്തുകൂടലുകൾ കേസുകൾ വർദ്ധിക്കാൻ കാരണമാകുന്നു“കെർഖോവ് വീഡിയോയിൽ പറഞ്ഞു. നിലവിലെ റിപ്പോർട്ട് ചെയ്തിരിക്കുന്ന കേസുകളിൽ 68 ശതമാനവും എക്സ്ബിബി സബ്‌ലൈനേജുകളുടെയും ജെഎൻ.1 പോലുള്ള മറ്റ് ഗ്രൂപ്പുകളുടെയും കേസുകളാണെന്നും അവർ കൂട്ടിച്ചേർത്തു.
“ചില രാജ്യങ്ങളിൽ, എക്സ്ബിബി ഉപവിഭാഗങ്ങളുണ്ട്. അവ ആഗോളതലത്തിൽ 68 ശതമാനം വരുന്നു. മറ്റ് ഗ്രൂപ്പിംഗ് ബിഎ.2.86 ആണ്. മറ്റ് ഒമിക്‌റോൺ ഉപവിഭാഗങ്ങളുമായി നമ്മൾ കണ്ടതിന് സമാനമായി ഗുരുതരമായ സാഹചര്യം ഇവ സൃഷ്ടിച്ചേക്കാം,” ഡോ കെർഖോവ് തന്റെ വീഡിയോ സന്ദേശത്തിൽ പറഞ്ഞു. വീഡിയോ സന്ദേശത്തിൽ, പ്രതിരോധ കുത്തിവയ്പ്പുകൾ സ്വീകരിക്കാനും അണുബാധയുണ്ടായാൽ ചികിത്സ തേടാനും ആളുകളോട് അഭ്യർത്ഥിച്ചു. കോവിഡ് കേസുകളുടെ വർദ്ധനവിന്റെ പശ്ചാതലത്തിൽ സിംഗപ്പൂരിലെ ആരോഗ്യ മന്ത്രാലയം (MOH) തിരക്കേറിയ സ്ഥലങ്ങളിൽ, പ്രത്യേകിച്ച് വീടിനുള്ളിൽ മാസ്ക് ഉപയോഗിക്കാൻ അളുകളോട് ആവശ്യപ്പെട്ടു. വിമാനത്താവളങ്ങളിൽ മാസ്ക് ധരിക്കുക, മോശം വായു സഞ്ചാരമുള്ള തിരക്കേറിയ പ്രദേശങ്ങൾ ഒഴിവാക്കുക തുടങ്ങിയ മുൻകരുതലുകൾ സ്വീകരിക്കാനും യാത്രക്കാരോട് അഭ്യർത്ഥിച്ചു.
അതേസമയം രാജ്യത്ത് അഞ്ച് കോവിഡ് മരണങ്ങൾ റിപ്പോർട്ട് ചെയ്തതായി അധികൃതർ അറിയിച്ചു. 335 പുതിയ കേസുകളും റിപ്പോർട്ട് ചെയ്തിട്ടുണ്ട്. സജീവ കേസുകളുടെ എണ്ണം 1,700-ലധികമാണ്. അഞ്ച് മരണങ്ങൾ റിപ്പോർട്ട് ചെയ്തതിൽ നാലെണ്ണവും കേരളത്തിലാണ്. മറ്റൊന്ന് ഉത്തർപ്രദേശിലാണ്. രാജ്യത്തെ മൊത്തം കോവിഡ് കേസുകളുടെ എണ്ണം 4.50 കോടിയാണ് (4,50,04,816). രോഗമുക്തി നേടിയവരുടെ എണ്ണം 4.46 കോടിയായി (4,44,69,799) ഉയർന്നു. ദേശീയ രോഗമുക്തി നിരക്ക് 98.81 ശതമാനമാണെന്ന് ആരോഗ്യ മന്ത്രാലയം അറിയിച്ചു. ഇതുവരെ, 5,33,316 പേർക്കാണ് കോവിഡ് -19 മൂലം ജീവൻ നഷ്ടമായത്. കേസിലെ മരണനിരക്ക് 1.19 ശതമാനമാണ്. മന്ത്രാലയത്തിന്റെ കണക്കുകൾ അനുസരിച്ച്, രാജ്യത്ത് ഇതുവരെ 220.67 കോടി ഡോസ് കോവിഡ് വാക്‌സിൻ നൽകിയിട്ടുണ്ട്.
Credits:https://malayalam.indiatoday.in/
About The Author
