നമ്മിൽ പലരും ആവശ്യത്തിനും അനാവശ്യത്തിനും നിത്യവും പലരോടും നമ്മോടു തന്നെയും ദേഷ്യപ്പെടാറില്ലേ ? ഇതിൽ പലതും അനാവശ്യ ദേഷ്യപ്പെടലുകളല്ലേ? നാം വലിയ ദേഷ്യക്കാരും ഗൗരവക്കാരുമാണെന്നറിയിക്കാനുള്ള ശ്രമമാണ് പലരും ഈ അനാവശ്യ ദേഷ്യപ്പെടലുകൾ കൊണ്ട് സ്വന്തമാക്കുന്നത്. എന്നാൽ മറ്റുള്ളവർക്കു മുന്നിൽ നാം അപഹാസ്യരാകുന്നവരാണെന്ന ബോധ്യം നമുക്കില്ലാതെ പോകുന്നു. ഇതിന് നമുക്ക് തിരിച്ചറിവുണ്ടാകണം. ഈ തിരിച്ചറിവുണ്ടായാൽ തിരികെ നടക്കാൻ ശ്രമിക്കണം. നാം ഒരു ചൂടനാണെന്നു കേൾക്കാൻ രസമുണ്ടായിരിക്കാം. എന്നാൽ ആ ചൂടിന്റെ പൊള്ളലേൽക്കുന്നവർ അസഹനീയമായ വേദനയനുഭവിക്കുന്നുണ്ടെന്ന് നമുക്ക് തിരിച്ചറിയാനാകുന്നില്ല. തിരിച്ചറിയുക എന്നത് ശ്രമകരമാണെങ്കിലും ശ്രമിച്ചാൽ സാധിക്കാത്തതായി ഒന്നുമില്ല. ജീവിതത്തിൽ തിരിച്ചറിവുകളുണ്ടാകേണ്ടത് അനിവാര്യവും അവശ്യവുമാണ്. ഈ തിരിച്ചറിവാണ് ആദ്യമുണ്ടാകേണ്ടത്. നമുക്ക് തിരിയാം, തിരികേ നടക്കാം തിരിച്ചറിവുകളിലേക്ക്.
