ജനനത്തിനും മരണത്തിനുമിടയിലുള്ള ഒരേടു മാത്രമാണ് നമ്മുടെ ജീവിതം. ഈ ജീവിതത്തിൽ എല്ലാവരിലും ഒരു പച്ച മനുഷ്യനുണ്ട്. പുരുഷന്റെ പരുക്കൻ ഹൃദയത്തിനുള്ളിലും മൃദുലതയും സന്നിഗ്ധതയുമുള്ള പെണ്ണിന്റെ നെഞ്ചകത്തിലും ആരും കാണാത്ത മറ്റൊരാൾ . തെല്ല് സ്വാർഥതകളുള്ള, എരിവും പുളിയുമുള്ള,തന്നിഷ്ടങ്ങളുള്ള ഒരാൾ! അത് ഓരോ കാലത്തിലും പാമ്പായും പ്രളയമായും കാമമായും പുറത്തു വന്നെന്നിരിക്കും. ചിലപ്പോഴത് സ്വയം മുക്കിക്കളയാം. അല്ലെങ്കിൽ അപഹാസ്യരാക്കി തീർത്തെന്നിരിക്കാം. ഒരു പറുദീസാ നഷ്ടത്തിന്റെ ഓർമപ്പെടുത്തൽ ! പച്ച മനുഷ്യൻ ഒന്നോർക്കുക – മരിച്ചാൽ പിന്നെ അവശേഷിക്കുന്നത് ജീവിച്ചിരിക്കുന്നവരുടെ ഹൃദയങ്ങളിലായിരിക്കുമെന്ന്. അവിടെ ഓർമയിലും പച്ചയായി തന്നെ അവശേഷിക്കണമെങ്കിൽ ജീവിക്കുമ്പോൾ പുഴു കുത്തലുകൾ വീഴാതിരിക്കട്ടെ.
