വായിച്ചു തീരാത്ത പുസ്തകങ്ങൾ – രമ പ്രസന്ന പിഷാരടി

വായിച്ചു തീരാത്ത

പുസ്തകങ്ങൾ വന്ന്

വാതിലിൽ മെല്ലെ  മുഖം

താഴ്ത്തിനിൽക്കുന്നു

വായനക്കായി മറന്നിട്ട

ജീവൻ്റെ പ്രാരബ്ദ-

പുസ്തകം മുന്നിൽ

ജ്വലിക്കുന്നു.

പാണൻ്റെ പാട്ടുകൾ

പാഴ്മുളം തണ്ടിലെ

ഓടക്കുഴൽ സ്വരം

നീർമാതളപ്പൂക്കൾ

വായിച്ചുവെങ്കിലും

തീരാതെ തീരാതെ

ഭൂമി, പ്രപഞ്ചം,

പ്രകാശയാത്രാവഴി

ലോകസഞ്ചാരം

നടത്തുന്ന പുസ്തക-

ത്താളിലേയ്ക്കിറ്റിറ്റു

വീഴും  നിലാവൊലി.

വായിക്കുവാനായി

സൂക്ഷിച്ച പുസ്തകം

വായനക്കായി

തപസ്സ് ചെയ്തീടുന്നു

വായിക്കുവാനായ്

തിരഞ്ഞോരു പുസ്തകം

കാലത്തിനുള്ളിൽ

മറഞ്ഞങ്ങരിക്കുന്നു

വായിച്ചുപേക്ഷിച്ച

പുസ്തകങ്ങൾ വന-

വാസത്തിലേയ്ക്ക്

നടന്ന് നീങ്ങീടുന്നു.

വായിച്ചുവെങ്കിലും

ഇന്നും അപൂർണ്ണമാം

താളുകൾക്കുള്ളിൽ

പ്രപഞ്ചം അചഞ്ചലം

ഓരോ ഋതുക്കളും

വന്നുപോകുമ്പോഴും

ഓർമ്മപ്പെടുത്തുന്ന

പുസ്തകത്താളുകൾ

നിൽക്കുക ഭൂമി

ഒരല്പനേരം ജന്മ-

പുസ്തകം വായിച്ചു

തീർക്കേണ്ടതുണ്ടിനി.

ചുറ്റിലും പുസ്തക-

ത്തോപ്പുകൾ, വാഴ്വിൻ്റെ

അക്ഷരം തേടുന്ന

പ്രാണൻ്റെ പക്ഷികൾ.

About The Author

Lima World Library

See author's posts