സംസ്ഥാനത്ത് ഇന്ന് ഏറ്റവുമധികം പേര്ക്ക് വാക്സീന് നല്കിയതായി ആരോഗ്യ മന്ത്രി വീണാ ജോര്ജ് അറിയിച്ചു. ഇന്ന് ഇതുവരെ 4,53,339 പേര്ക്കാണ് വാക്സിന് നല്കിയത്. സംസ്ഥാനത്ത് ആദ്യമായാണ് ഒരു ദിവസം ഇത്രയേറെ പേര്ക്ക് വാക്സിന് നല്കുന്നത്. ഇന്ന് വന്ന 38,860 ഡോസ് കോവാക്സിന് ഉള്പ്പെടെ ഇനി സംസ്ഥാനത്ത് രണ്ട് ലക്ഷത്തോളം വാക്സിന് മാത്രമാണ് സ്റ്റോക്കുള്ളത്. ഞായറാഴ്ച കൂടുതല് വാക്സിന് കേന്ദ്ര സര്ക്കാര് അനുവദിച്ചില്ലെങ്കില് സംസ്ഥാനത്തെ വാക്സിനേഷന് അനിശ്ചിതത്വത്തിലാകുമെന്നും മന്ത്രി വ്യക്തമാക്കി.
കേരളം 10 ലക്ഷം വാക്സിന് പൂഴ്ത്തി വച്ചിരിക്കുന്നു എന്ന കേന്ദ്രവാദത്തിന് പിന്നാലെയാണ് ഇന്ന് കൂടുതല് വാക്സീന് വിതരണം ചെയ്തത്. മികച്ച രീതിയില് വാക്സിന് നല്കുന്ന സംസ്ഥാനമാണ് കേരളമെന്ന് മന്ത്രി അവകാശപ്പെട്ടു. ദേശീയ ശരാശരിയേക്കാള് കൂടുതലാണ് സംസ്ഥാനത്തെ വാക്സിനേഷന്. ആരോഗ്യ പ്രവര്ത്തകര്ക്കും മുന്നണി പേരാളികള്ക്കുമുള്ള ആദ്യ ഡോസ് വാക്സിനേഷന് 100 ശതമാനത്തിലെത്തിച്ചു. ഈ ആഴ്ച മാത്രം 16 ലക്ഷത്തോളം പേര്ക്കാണ് വാക്സിന് നല്കിയത്. ഇതോടെ ഒരു ദിവസം 4 ലക്ഷത്തിന് മുകളില് വാക്സിന് നല്കാന് കഴിയുമെന്ന് സംസ്ഥാനം തെളിയിച്ചിരിക്കുകയാണെന്ന് അവർ പറഞ്ഞു.
ഇന്ന് 1522 വാക്സിനേഷന് കേന്ദ്രങ്ങളാണ് പ്രവര്ത്തിച്ചത്. സര്ക്കാര് തലത്തില് 1,380 കേന്ദ്രങ്ങളും സ്വകാര്യതലത്തില് 142 കേന്ദ്രങ്ങളുമാണുണ്ടായിരുന്നത്. 59,374 പേര്ക്ക് വാക്സിന് നല്കിയ കണ്ണൂര് ജില്ലയാണ് മുമ്പില്. 53,841 പേര്ക്ക് വാക്സിന് നല്കി തൃശൂര് ജില്ലയും 51,276 പേര്ക്ക് വാക്സിന് നല്കി കോട്ടയം ജില്ല തൊട്ട് പുറകിലുണ്ട്.
സംസ്ഥാനത്ത് ഇതുവരെ ഒന്നും രണ്ടും ഡോസ് ചേര്ത്ത് ആകെ 1,83,89,973 പേര്ക്കാണ് വാക്സിന് നല്കിയത്. അതില് 1,28,23,869 പേര്ക്ക് ഒന്നാം ഡോസ് വാക്സിനും 55,66,104 പേര്ക്ക് രണ്ടാം ഡോസ് വാക്സിനുമാണ് നല്കിയത്. 2011ലെ സെന്സസ് അനുസരിച്ച് ആകെ ജനസംഖ്യയുടെ 38.39 ശതമാനം പേര്ക്ക് ഒന്നാം ഡോസും 16.66 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. ഈ സെന്സസ് അനുസരിച്ച് 18 വയസിന് മുകളിലുള്ളവരുടെ ജനസംഖ്യയില് 53.43 ശതമാനം പേര്ക്ക് ഒന്നാം ഡോസും 23.19 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. ഇത് കേന്ദ്ര ശരാശരിയേക്കാള് വളരെ മുന്നിലാണെന്നും സര്ക്കാര് പറയുന്നു.
