തികച്ചും രോഗാതുരമായ ലോകത്തിലാണ് നാമിന്ന് ജീവിക്കുന്നത്. ചിക്കുൻഗുനിയ, ഡെങ്കിപ്പനി, ജപ്പാൻ ജ്വരം, പന്നിപ്പനി, പക്ഷിപ്പനി, നിപ്പ, കൊറോണ, ഒടുവിൽ സിക വരെ എത്തി നിൽക്കുന്നു. ഈ വൈറസുകൾക്കെതിരെ സന്ധിയില്ലാ സമരമുഖത്താണ് നാം. സാമൂഹിക അകലം, കൈ കഴുകൽ, സാനിറ്റൈസിംഗ്, മുഖാവരണം തുടങ്ങിയ മുൻകരുതലുകൾ ശീലിക്കാൻ തുടങ്ങിയിട്ട് നാളേറെയായി.എന്നാൽ നമ്മുടെ സമൂഹത്തിൽ നിലനിൽക്കുന്ന തിൻമകളാകുന്ന വൈറസുകൾക്കെതിരേ ജാഗരൂകരാണോ നാം? ഏറ്റവുമധികം ഭയക്കേണ്ട വൈറസുകളാണിവ. മനുഷ്യമനസ്സുകളിലാണ് ഈ സൂക്ഷ്മാണുക്കൾ ഗർഭം ധരിച്ച് പ്രസവിക്കുന്നത്. നൻമയുടെയും തിൻമയുടെയും ഗർഭപാത്രം നമ്മുടെ മനസ്സു തന്നെയാണ്.അതുകൊണ്ടല്ലേ നസ്രായൻ നൂറ്റാണ്ടുകൾക്കു മുമ്പേ പറഞ്ഞു വച്ചത്: പുറമേ നിന്ന് ഉള്ളിലേക്കു പോകുന്നതല്ല മനുഷ്യനെ അശുദ്ധനാക്കുന്നത് മറിച്ച് മനുഷ്യനിൽ നിന്ന് പുറത്തേക്കു വരുന്നതാണ് അവനെ അശുദ്ധനാക്കുന്നതെന്ന്. ഇതിൻ്റെ പൊരുൾ നാം എന്നു ഗ്രഹിക്കുന്നുവോ അന്ന് മാരകമായ ഈ വൈറസിൽ നിന്ന് നാം രക്ഷപ്പെടും.കാരണം, ചികിൽസിച്ച് മരുന്നു നൽകി നീക്കാവുന്ന വൈറസല്ല.നാം സ്വയം തീരുമാനിച്ചു അകറ്റേണ്ടതാണിത്.
ജോസ് ക്ലെമൻ്റ്
