Jayasurya: കർഷക വിഷയത്തിൽ സംസ്ഥാന സർക്കാരിനെതിരെ നടൻ ജയസൂര്യ നടത്തിയ പരാമർശം വിവാദങ്ങൾക്ക് വഴിതുറന്നിരിക്കുകയാണ്. സമൂഹമാധ്യമങ്ങളിൽ ജയസൂര്യയെ അനുകൂലിച്ചും വിമർശിച്ചുമുള്ള അഭിപ്രായ പ്രകടനങ്ങളും സജീവമായിരിക്കുകയാണ്.
നെല്ല് സംഭരണ വിഷയത്തിൽ താൻ പറഞ്ഞ നിലപാടിൽ ഉറച്ച് നിൽക്കുന്നതായി ജയസൂര്യ വ്യക്തമാക്കിയിരിക്കുകയാണ്. തനിക്ക് കക്ഷി രാഷ്ട്രീയമില്ല. കർഷക പക്ഷത്താണ് താൻ. ആറു മാസം മുമ്പ് സംഭരിച്ച നെല്ലിന്റെ വില ഇനിയും കർഷകർക്ക് കൊടുക്കാത്തത് അനീതിയല്ലേ എന്നും ജയസൂര്യ ചോദിക്കുന്നു. കളമശേരിയിലെ വേദിയിൽ താൻ എത്തിയപ്പോഴാണ് കൃഷി മന്ത്രി അവിടെ ഉണ്ടെന്ന കാര്യം അറിഞ്ഞത്. കർഷകരുടെ വിഷയം വേദിയിൽ പറയാതെ നേരിട്ട് പറഞ്ഞാൽ അത് ലക്ഷ്യപ്രാപ്തിയിൽ എത്തില്ല. അതുകൊണ്ടാണ് വേദിയിൽ തന്നെ പറയാൻ തീരുമാനിച്ചതെന്നും ജയസൂര്യ പറഞ്ഞു. ഒരു മലയാള ദിനപത്രത്തിലെ കുറിപ്പിലാണ് താരത്തിന്റെ വിശദീകരണം.
നടന്റെ അഭിപ്രായം വസ്തുതാ വിരുദ്ധമെന്ന് കൃഷി മന്ത്രിയും ഭക്ഷ്യ മന്ത്രിയും പ്രതികരിച്ചിരുന്നു.
വിവാദങ്ങൾക്ക് ഇടയാക്കിയ ജയസൂര്യയുടെ വാക്കുകൾ:
‘‘കൃഷിക്കാരുടെ പ്രശ്നങ്ങള് ചെറുതല്ലെന്ന് ബഹുമാനപ്പെട്ട മന്ത്രിമാര് മനസ്സിലാക്കണം. എന്റെ സുഹൃത്തും കര്ഷകനും നടനുമായ കൃഷ്ണപ്രസാദ്, കഴിഞ്ഞ അഞ്ചാറുമാസമായി നെല്ല്കൊടുത്തിട്ട് ഇതുവരെ സപ്ലൈക്കോ പണംകൊടുത്തിട്ടില്ല. തിരുവോണനാളില് അവര് ഉപവാസം ഇരിക്കുകയാണ്. നമ്മുടെ കര്ഷകര് പട്ടിണി ഇരിക്കുകയാണ്. അധികൃതരുടെ ശ്രദ്ധയില് എത്തിക്കാന് വേണ്ടിയാണ്. പുതിയ തലമുറയിലെ ചെറുപ്പക്കാര് കൃഷിയിലേക്ക് വരുന്നില്ലെന്നാണ് മന്ത്രിമാര് പറയുന്നത്. സാറ് ഒരു കാര്യം മനസ്സിലാക്കണം. തിരുവോണ ദിവസുംകൊടുത്ത നെല്ലിന്റെ പണത്തിന് വേണ്ടി പട്ടിണി കിടക്കുന്ന അച്ഛനെയും അമ്മയെയും കാണുന്ന മക്കള് എങ്ങനെയാണ് സാര്, കൃഷിയിലേക്ക് വരുന്നത്. ഒരിക്കലും വരില്ല. അതുകൊണ്ട് കര്ഷകരുടെ പ്രശ്നത്തില് അതിവേഗം സര്ക്കാര് ഇടപെടണം.’ ജയസൂര്യയുടെ വാക്കുകൾ ഇങ്ങനെയായിരുന്നു.
credits: https://malayalam.indiatoday.in/
