അമ്മ എവിടെ ? – ജയൻ വർഗീസ്

‘( കേരളം കണ്ട ഏറ്റവും വലിയ പ്രകൃതി ദുരന്തത്തിൽ അടി പിണഞ്ഞ സഹോദരങ്ങൾക്കായി സമർപ്പിക്കുന്നു. )

‘അമ്മ തൻ നെഞ്ചിൽ ഉറങ്ങിക്കിടന്നൊരു

കുഞ്ഞായിരുന്നു ഞാൻ കൂട്ടിൽ.

പൊന്നണിഞ്ഞെത്തും പ്രഭാത ത്തുടുപ്പിന്റെ

കന്നിക്കതിരായിരുന്നു !

അമ്മേ യനശ്വര സ്തന്യമായ് സ്നേഹത്തി –

ന്നന്നം ചുരത്തിയോരമ്മേ,

എന്തിനാ മാറിൽ  നിന്നെന്നെ പറിച്ചെറി-

ഞ്ഞിന്നീ കരാളം  ചതുപ്പിൽ  ?

കത്തിയെരിഞ്ഞ പ്രപഞ്ച നിഗൂഢത –

ക്കിപ്പുറം വന്ന നിൻ സ്നേഹം ,

ചിപ്പിയിൽ മുത്തുപോൾ ജീവന്റെ യുൾതാള

സത്യമായ് എന്നെ രചിച്ചു !

മുത്തണിപ്പൊൻ മുലക്കച്ച തുറന്നെനി

ക്കെത്ര മുലപ്പാൽ ചുരത്തി ?

എത്ര ശതകോടി വർഷാന്തരങ്ങളിൽ

മൊത്തി നീയെന്നെ വളർത്തീ ?

എന്നിട്ടു മീവിധം സംഹാര രുദ്രയായ്

എന്നെ പറിച്ചെറിഞ്ഞീടാൻ

എന്തപരാധം നിൻ സ്വപ്ന പുഷ്പങ്ങളിൽ

എന്തേ പുഴുക്കുത്ത് വീഴാൻ ?

അമ്മേ ക്ഷമിക്കൂ ഇനിയുമൊരായിരം

ജന്മങ്ങൾ മണ്ണിൽ തളിർക്കും !

ഞാനാണവർ നാളെ നാളമായ് മാറേണ്ട

നാടിന്റെ മൺ ചെരാതങ്ങൾ !

About The Author

LIMA

See author's posts