കംഹാസുരോപദ്രവങ്ങള് സഹിയാഞ്ഞു
ദേവകളൊന്നിച്ചു യാത്രയായി
മൂര്ത്തികള് മൂന്നോടും സങ്കടം ചൊല്ലവേ
സൃഷ്ടിച്ചു ത്രിപുരഭൈരവിയെ
ദേവിയെക്കണ്ടു ഭയന്നു കംഹാസുരന്
ഋശ്യമൂകാചലം തന്നിലെത്തി
ഉഗ്രതപസ്സില് മുഴുകിയിരിക്കുമ്പോള്
കാലങ്ങളേറെ കടന്നുപോയി
കോലാപുരത്തിലധിവസിച്ചാനപ്പോള്
മഹിഷാസുരന് മഹാദുഷ്ടനന്ന്
ലോകങ്ങള് മൂന്നും പിടിച്ചടക്കി ദേവ-
നാരികളെപ്പോലും ദാസരാക്കി
ദേവകള് ബ്രഹ്മാവു ശംഭുവുമൊന്നിച്ചു
പാലാഴിവാസന്റെ മുമ്പിലെത്തി
കോലമഹര്ഷിയെ കുടജാദ്രിയില് ചെന്നു –
കാണുവാന് വിഷ്ണുവും നിര്ദ്ദേശിച്ചു
നാരിയാല് മാത്രം മരിക്കാന് വരമുള്ള
മഹിഷനെ കൊല്ലുവാന് കോലമുനി
ആദിപരാശക്തിയോടപേക്ഷിച്ചപ്പോള്
ദേവി മഹിഷനെ നിഗ്രഹിച്ചു
ജ്യോതിര്ശ്രീചക്രേ ത്രിമൂര്ത്തികള് ദേവിയെ
തേജോമയിയായ് പ്രതിഷ്ഠചെയ്താര്
ശിവശക്തിചൈതന്യസാന്ദ്രമാം ലിംഗത്തില്
സൗവര്ണ്ണരേഖ തെളിഞ്ഞിതപ്പോള്…
