അണിചേരുക പടയണിയിൽ – ജയൻ വർഗീസ്.

മനസ്സിലെ വിഗ്രഹങ്ങൾ

മണ്ണിൽ വീണുടയുന്നു

മറ്റൊരു ലോകം വെറും

സ്വപ്നമാണിന്നും ?

പഴമകൾ ഉഴുതിട്ട

പാടത്ത് മാറ്റത്തിന്റെ

കതിർക്കുല വിളയുമെ –

ന്നോർത്തിരുന്നൂ ഞാൻ

പുതുമകൾ ഇടി വെട്ടി

പെരുമഴ പെയ്യും നേരം

കരളിന്റെ കണ്ണീർക്കായാൽ

മട വീഴ്ചകൾ !

അപരനെ കരുതാത്ത

മതങ്ങളെ കാലത്തിന്റെ

തടവറയ്ക്കുള്ളിൽ തള്ളി തച്ചു കൊല്ലേണം

ഒരു യുഗപ്പിറപ്പിന്റെ

തുടിതാളപ്പെരുമയിൽ

മനുഷ്യനായ് മാറാൻ വേണം

പടയണിക്കാലം !