പുലരിപ്പെണ്ണ് കതകേ തട്ട്യാ
വീട്ടിലെപെണ്ണ്
ചട പടേ …യൊരുങ്ങും.
അടുക്കള പോതിക്ക്
വിളക്ക് വെച്ച്
വീട്ടിലെ വയറോളെ പോറ്റാൻ
മുക്കല്ലടുപ്പിൽഅന്നം വേവും.
വെട്ടിത്തിളക്കണ വെള്ളത്തിൽ
ഒരീസത്തെ മുഴ്വൻ
ഉന്മേഷമൂറ്റിപ്പൊടിയിടും.
ചായക്കോപ്പേൽ
ആവിപാറിച്ച്
തിണ്ണേലെ തേവന്
ദക്ഷിണ വെക്കും.
വെന്തും നീറിം പുകഞ്ഞും
മരിക്കാൻ
അടുക്കളക്കൊട്ടേൽ
ആരൊക്കെയോ കാണും.
ചൂടു കല്ലിൽ
പൊള്ളി മൊരിഞ്ഞ്
പരന്ന്
കുറേയെണ്ണം
പാത്രത്തിലടുങ്ങും.
പൊള്ളിത്തടിച്ച്
മേടേലെ മാമനെ പോലെ
ചില ആളോള്
നുറുങ്ങി തവിടുപൊടി –
യാവാൻനിക്കും.
ചില കൂട്ടര്
അമ്മിക്കല്ലിൽ
ചതഞ്ഞരയും .
കരിയുറഞ്ഞ
കയ്ക്കലത്തുണികൾ
പാതകത്തട്ടേലിരുന്ന്
പല്ലിളിക്കും.
മേശേമ്മേ തീന് വിളമ്പുമ്പോൾ
പെണ്ണിന്റെ നടു
മുപ്പത്താറ് കഷ്ണാവും.
പുളിച്ചു തികട്ടണ
എച്ചിൽ പാത്രങ്ങൾ
അധികാര ഗർവ്വോടെ
പെണ്ണിന് നേരെ
പുരികമുയർത്തും.
വിയർപ്പ് കുത്തണ
തുണികളെല്ലാം
തലതല്ലിയുണങ്ങാൻ
നോക്കിയിരിക്കും.
പെണ്ണിന്റെ കുഞ്ഞുചിറകുകൾ
മാറാല കെട്ടി
തട്ടുമ്പൊറത്താവും.
പൊടിയായ പൊടിയെല്ലാം
തടുത്ത്കൂട്ടിയടിച്ച് വാരി
പുരയ്ക്കകം പെണ്ണ്
കണ്ണാടിയാക്കും.
പൂമുഖത്തിണ്ണേല്
കാലുംനീട്ടി
നെഞ്ച് വിരിച്ച്
നിവർന്നിരുന്ന്
വീരത്തം പറയണതേവനുണ്ടോ
അടുക്കളപ്പെണ്ണിന്റെ
മേളമറിയുന്നു.!!!
About The Author
