വായനവാരം – ദിആൽക്കെമിസ്റ്റ് പൗലോ കൊയ് ലോ

വായനവാരം

ദിആൽക്കെമിസ്റ്റ് പൗലോ കൊയ് ലോ-

ഒരു മാന്ത്രിക കല്ല് ! അത് തൊട്ടാൽ ഏത്  ലോഹവും  സ്വർണ്ണമായി മാറും . അത് അന്വേഷിച്ച ശാസ്ത്രജ്ഞരെ ലോകം ഒരു കാലത്ത് അൽകെമിസ്റ്റ് എന്ന് വിളിച്ചു. പിന്നീട് രസതന്ത്രം എന്ന ശാസ്ത്രശാഖക്ക് ജന്മം നൽകിയത് ആൽക്കെമിസ്റ്റുകളാണ്.
അങ്ങനെയൊരു മാന്ത്രിക കല്ല് ശാസ്ത്രജ്ഞർ കണ്ടെത്തിയോ ?  ഇല്ല , പക്ഷേ ആ മാണിക്യ കല്ല്  നമ്മുടെ എല്ലാവരുടെയും കയ്യിൽ ഉണ്ട്. അതാണ് അടങ്ങാത്ത അഭിനിവേശം , നമ്മൾ ആഗ്രഹിക്കുന്നത് കണ്ടെത്തും എന്ന അത്യാവശ്യം വേണ്ട  ശുഭാപ്തി വിശ്വാസവും ആ കല്ലിൽ ഉണ്ട്.
പൗലോ കൊയ്ലോയുടെ ‘ അൽകെമിസ്റ്റ് ‘ വായിക്കുന്നത് ഏതാണ്ട് പത്ത് കൊല്ലം മുമ്പാണ് . പുസ്തകത്തിൻ്റെ വിശദാശംസങ്ങൾ മറന്നു പോയെങ്കിലും ഒരു നല്ല വായനയുടെ സുരഭില ഓർമ്മകൾ ഇന്നും പിന്തുടരുന്നു .
സ്പെയിനിലെ ഒരു തകർന്ന ക്രിസ്ത്യൻ പള്ളിയിൽ ഇരിക്കുമ്പോഴാണ് സാൻ്റിയാഗോ എന്ന ഇടയന് സ്വപ്നത്തിലൂടെ ഒരു വെളിപാട് കിട്ടുന്നത് : ഈജിപ്തിലെ പിരമിഡുകൾക്കരികിൽ എവിടെയോ ഒരു നിധി കിടപ്പുണ്ട്. അവൻ ഉടനെ തന്നെ അങ്ങോട്ടു യാത്ര തിരിക്കുകയായി. വഴിയിൽ പല നല്ല അനുഭവങ്ങളും കൊള്ളയടി ഉൾപ്പെടെ പല ചീത്ത അനുഭവങ്ങളും ഉണ്ടായി. പുതിയ ആളുകൾ പലരെയും പരിചയപ്പെട്ടു , ഫാത്തിമ എന്നൊരു സുന്ദരി കുടുക്കയെ പ്രേമിക്കാനും സമയം കിട്ടി. അവസാനം പിരിമിഡുകൾക്കിടയിൽ നിധി തിരയവേ ഒരു സംഘം ആളുകൾ അവനെ പിടി കൂടി. സ്വപ്നത്തിൽ കണ്ട നിധി തിരയുകയാണെന്ന് പറഞ്ഞപ്പോൾ സംഘത്തലവൻ പറയുന്നു , അയാളും അത് പോലെ ഒരു സ്വപ്നം കണ്ടു , സ്പെയിനിലെ ഒരു തകർന്ന പള്ളിയുടെ അടിയിൽ ഒരു നിധിയുള്ളതായിട്ട് . അതായത് നിധിയുള്ളത് സാൻ്റിയാഗോ യാത്ര പുറപ്പെട്ട സ്ഥലത്ത്. അതോടെ കഥ അവസാനിക്കുന്നു .
” ഒരു കാര്യം ഉൽക്കടമായി ആഗ്രഹിച്ചാൽ ലോകം മുഴുവൻ അതിനായി കൂടെ നിൽക്കും ” എന്നൊരു ആശയം പൗലോ കൊയ്ലോ ഈ നോവലിൽ പറയുന്നുണ്ട്. അത് ലോകവ്യാപകമായി Quote ചെയ്യപ്പെടുന്നുണ്ട്. പക്ഷേ ആഗ്രഹം മാത്രം പോരാ , അതിനായി അദ്ധ്വാനിക്കാനും തയ്യാറാകണം എന്നൊരു സന്ദേശം കൂടി സാൻ്റിയാഗോയുടെ പ്രവർത്തനങ്ങളിലൂടെ  തെളിയുന്നുണ്ട്.
പിന്നെ എന്ത് കൊണ്ട് സാൻ്റിയാഗോക്ക് നിധി കിട്ടിയില്ല ? ആ ചോദ്യം എന്നെ വളരെയധികം അലട്ടി. ഒടുവിൽ ആ ഉത്തരം മനസ്സിലേക്ക് ഒരു ദിവസം വന്നെത്തി.
കാണാപൊന്ന്  തേടിയുള്ള ആ യാത്രയിൽ അവൻ പരിചയപ്പെട്ട അനുഭവങ്ങളുടെ  ജീവിത പരിച്ഛേദങ്ങളായിരുന്നു അവന് കിട്ടിയ നിധികൾ .
എവിടെ നിന്നോ പറന്നു വന്ന ഒരു  ചിത്രശലഭം. വഴിയരിക്കിലെ ജിപ്സി സ്ത്രീ. ജ്ഞാനിയായൊരു വൃദ്ധന്‍.  ഏതോ ഒരു പഴഞ്ചൻ രാജാവ്. ഇരുമ്പ് സ്വർണ്ണമാക്കാൻ നടക്കുന്ന ഒരു   ആല്‍ക്കെമിസ്റ്റ്,  ഉപദ്രവകാരികളായ കള്ളന്മാരും കൊള്ളക്കാരും ,  ഈജ്പ്ഷ്യൻ വരവർണ്ണിനി  ഫാത്തിമ എന്ന സുന്ദരി തുടങ്ങിയവരൊക്കെ അവന്  അനുഭവ സമ്പത്തിൻ്റെ നിധികളായിരുന്നു .
ലോകത്ത് ഏറ്റവും അധികം വിവർത്തനം ചെയ്യപ്പെട്ട നോവലാണ് ആൽക്കെമിസ്റ്റ്. മലയാളത്തിലേക്ക് വിവർത്തനം ചെയ്തത് ശ്രീമതി രമാ മേനോൻ .
നല്ല വായനാനുഭവം , നല്ല ദാർശനിക പ്രഭാവം  , നല്ല കഥാപാത്ര നിർമ്മിതി അതാണ് പൗലോ കൊയ്ലോയുടെ അൽക്കെമിസ്റ്റ്

 വൃന്ദ പാലാട്ട്