പത്മരാജന്റെ ”കൈവരിയുടെ തെക്കേയറ്റം” എന്ന കഥാസമാഹാരം സംഭവബഹുലതയേക്കാള് മനുഷ്യഹൃദയത്തിന്റെ സൂക്ഷ്മ ചലനങ്ങളെയാണ് പ്രാധാന്യത്തോടെ ഏറ്റെടുക്കുന്നത്. പറയാതെ പോയ വാക്കുകളും നിറയാതെ പോയ ആഗ്രഹങ്ങളും മനസ്സിനുള്ളിലെ ഒറ്റപ്പെടലുകളും ആണ് ഈ കഥകളുടെ യഥാര്ത്ഥ കേന്ദ്രം. പുറമേ ലാളിത്യമായി തോന്നുന്ന സാഹചര്യങ്ങളിലൂടെ അഗാധമായ മാനസിക ഭൂമികയിലേക്കാണ് വായനക്കാരനെ അദ്ദേഹം നയിക്കുന്നത്.
ഗ്രാമവും നഗരവും, സ്നേഹവും വഞ്ചനയും, സൗഹൃദവും വിരഹവുമെല്ലാം ഇവിടെ പരസ്പരം ലയിച്ചാണ് നിലകൊള്ളുന്നത്. കഥാപാത്രങ്ങള് വലിയ നായകരല്ല; നമ്മുടെ ചുറ്റുമുള്ള സാധാരണ മനുഷ്യര്, അവരുടെ നിശ്ശബ്ദ വേദനയും അമര്ന്ന ആഗ്രഹങ്ങളും പത്മരാജന്റെ തൂലികയില് അസാധാരണമായി തെളിയുന്നു. വാക്കുകളില് മിതത്വം പാലിച്ചിട്ടും വികാരങ്ങളില് അമിത സത്യസന്ധത പുലര്ത്തുന്ന ശൈലിയാണ് ഈ സമാഹാരത്തിന്റെ ഏറ്റവും വലിയ കരുത്ത്.
”കൈവരിയുടെ തെക്കേയറ്റം” എന്ന ശീര്ഷകം തന്നെ ഒരു പ്രതീകമാണ്. എത്തിപ്പെടാന് കഴിയാത്ത സ്വപ്നത്തിന്റെ അതിരുപോലെ, കഥകളിലെ പല കഥാപാത്രങ്ങളും ജീവിതത്തിന്റെ ഒരു അപ്രാപ്യമായ തീരത്തിലേക്ക് നോക്കി നില്ക്കുന്നു. ആ നോട്ടത്തിന്റെ നിശ്ശബ്ദതയാണ് വായനക്കാരനെയും കൂടുതല് ആഴത്തിലേക്കു പിടിച്ചിറക്കുന്നത്.
മലയാള ചെറുകഥാ സാഹിത്യത്തില് പത്മരാജന്റെ സ്ഥാനം ഉറപ്പിക്കുന്ന, മനസ്സില് പതിയുന്ന നിശ്ചലതയും സാന്ത്വനവും ഒരുപോലെ നല്കുന്ന ഒരു സമാഹാരമാണ് ”കൈവരിയുടെ തെക്കേയറ്റം”. വായനയില് ഉള്പ്പെടുത്തേണ്ട പുസ്തകങ്ങളില് ഒന്ന്. ജീവിതചര്യ, അരപ്പട്ട കെട്ടിയ ഗ്രാമത്തില്, റാണിമാരുടെ കുടുംബം എന്നിങ്ങനെ പതിനഞ്ചു കഥകളാണ് ഈ സമാഹാരത്തിലുള്ളത്. ഓരോ കഥകളും വ്യത്യസ്തം. 102 പേജ് മാത്രമുള്ള ഈ പുസ്തകമിറക്കിയത് കറന്റ് ബുക്ക്സ് തൃശൂര് ആണ്. വില 75?.
