‘ആമിനാ, ജ്ജ് അറിഞ്ഞാ ബീവാത്തുന്റെ കെട്ടിയോന് ജൊരം വന്ന് കെടപ്പാ’. ഞമ്മള് ഓളോട് പറഞ്ഞ് .’ ‘ അള്ളാ ഓനാ . ഓന് നല്ല ബെടിപ്പത്തിരി പോലിരുന്ന ആളാണല്ലാ, ന്താ ങ്ങനെ ? ന്തോരം ഏനക്കേടുകളാ. മനുസമ്മാര് ങ്ങനെ ദെവ്സോം ഓരോന്ന് ബന്ന് ഠിം ന്ന് തീര്ന്ന്പോണ് ‘ ങ്ങന പറഞ്ഞ് ഓള് നെടുവീര്പ്പെട്ട്.
ഓന് കാശിമ്മിണി തീരുംന്നാ ഞമ്മള ഗ്രൂപ്പീന്ന് അറിഞ്ഞത്. ന്താ പ്പ ങ്ങനെ? ആമിനാ, ജ്ജ് ആ ടീവി ഒന്ന് ഓണാക്ക് ന്റ മുത്തേ. കറിയ്ക്കരിഞ്ഞോണ്ടിരുന്ന ഓള് ന്നയൊരു നോട്ടം നോക്കി. ഒരു പണീം ല്ലാത്ത ങ്ങക്കെന്താ എണീറ്റ് ശെയ്തുടേ എന്ന ഓള്ട നോട്ടത്തിന്റെ പൊരുള്ന്ന് ഞമ്മക്ക് അപ്പത്തന്ന മനസിലായോണ്ട് ഞമ്മള് തന്ന പോയി ഓണാക്കി.
ന്താ ടീവീല്, ഡാക്കിട്ടറിനോട് ശോദിക്കാന്നുള്ള പരിപാടിയാണ് . ഞമ്മള മുയുവന് നോട്ടോം ടീവീമ്മേലായി. ‘ങ്ങക്ക് കുറച്ച് ദെവസമായി ജലദോശം, തലവേദന, ശരീരവേദന എന്നിവയുണ്ടെങ്കില് അതൊരു പുതിയ ജൊരം ഇപ്പ എറങ്ങീട്ടൊണ്ട്, അതാകാനും സാധ്യത ഒണ്ടെന്നു’ ള്ള ബര്ത്താനം കേട്ട പാതി ഞമ്മള് പോയി ആ പെട്ടി അണച്ച് വച്ച് .
ങ്ങക്കെന്തിന്റ കേടാ മനുസ്യാന്ന് ന്നും പറഞ്ഞ് ഓള് തുള്ളാന് തൊടങ്ങി. ഞമ്മക്ക് കൊറേ ദെവസായി ഇമ്മാതിരി ഒരു ജലദോശോം വേദനേം ഒണ്ടെന്ന് ഓള്ക്ക് അറിയാത്തതില് ഞമ്മക്ക് പെരുത്ത ബെശമം തോന്നി. ജ്ജ് മിണ്ടാണ്ടിരി ന്നും പറഞ്ഞു ഞമ്മള് മൊബൈലില് തോണ്ടാന് തൊടങ്ങി.
അള്ളാ, പച്ച ലൈറ്റേല് കൊറേ ബന്നിട്ട്ണ്ട്ല്ലാ, ഞമ്മള സ്കൂള് ഗ്രൂപ്പില് ആരാണ്ട് ചേര്ന്നല്ലപ്പാ .
ബല്ല പെണ് കുട്ട്യോളും ആണോന്നറിയാന് മത്തി കണ്ട പൂച്ചേനപ്പോലെ ഞമ്മ തോണ്ടാന് തൊടങ്ങി. ഞമ്മള് കണ്ട കിനാവിനെ തോല്പ്പിച്ച മാതിരി ദാ ബന്നിരിക്കണ് പഴേ കബീര്. ഓനിപ്പ ഏജന്റാണ്ന്ന്.
ഓന്റെ പോളിസി പിടുത്തം നടക്കണ് ഞമ്മള ഗ്രൂപ്പില്. പുതിയ ഓഫറും ഉണ്ട്. ‘ചത്തു കയിഞ്ഞാ പിന്ന കായ് ഞമ്മള് അടക്കണ്ടാന്ന് ‘.
അല്ല പിന്ന അത് ഞമ്മക്കറിയൂല്ലേ, അല്ല ഓനോടിപ്പ എന്തന്ന് പറയാനാണ്?
ഞമ്മള ബല്ല കാറാ ലോറിയാ ഇടിച്ചാല് ഞമ്മളടച്ച കായിന്റ എരട്ടി തരൂന്ന്, ഞമ്മള് ഒഴിഞ്ഞങ്ങ് നടക്കും, പെരേന്ന് എറങ്ങാതിരുന്നാ പോരേ അല്ല ഞമ്മളോടാ കളി, പിന്നേം ഒണ്ട്. ഞമ്മള് ബയസായ പെന്ശന് കിട്ടും, പക്ഷേങ്കി ഞമ്മള് അടച്ചോണ്ടിരിക്കണം ന്ന്. അയിന് ഞമ്മളടച്ചില്ലേല് ഓന്റ വാപ്പ വന്ന് അടയ്ക്കോന്ന് ശോദിക്കണം ന്ന് ണ്ടാര്ന്ന്, ഞമ്മള് ബേണ്ടാന്ന് വച്ച്. ബെര്തേ ന്തിനാ ല്ലേ.
ഓള് കറിയ്ക്ക് ബെട്ടുവാണേലും നോട്ടം മുയുവനും ഞമ്മള ഫോണേലാന്ന് മനസിലായോണ്ട് ഒന്നും അറിയാത്ത പോല ഞമ്മള് പറഞ്ഞ്, ‘ആമിനാ ഒരു പോളിസി എട്ക്കണേപ്പറ്റി ന്താണ് ജ്ജ് പറേണത് ‘ . ‘അന്നെക്കൊണ്ട് കൂടുതലൊന്നും പറയിപ്പിക്കാണ്ടിരുന്നാ ങ്ങക്ക് നല്ലതൂ’ന്നും പറഞ്ഞ് ഓള് ചാടിത്തുള്ളി അടുക്കളേപ്പോയി. അല്ല നിക്കെന്തിന്റ കേടാരുന്നൂന്നാ പ്പ ആലോചിക്കണെ….. ന്താല്ലേ ?
